Thursday, June 1, 2017

என்ன டா இது சென்னைக்கு வந்த சோதனை!!!

'வந்தாரை வாழவைக்கும்' சென்னை, 'சிங்கார சென்னை' என்ற புகழுக்கு சொந்தமான என் சென்னை மாநகரம் தொடர்ந்து சில காலங்களாக பாதிப்புக்குள்ளாகி வருகிறது.
2015ல் பெரும் மழை 🌧️ வெள்ளம் ஏற்பட்டு பல உயிர் சேதம், பொருள் சேதம்.

2016ல் வர்தா புயல்🌪️ தாக்கத்தால் பல ஆயிரக்கணக்கான மரங்கள் அழிவு.

2017ல் தொடக்கத்தில் இரண்டு கப்பல்கள் மோதிக்கொண்டதை🚤🛳️ அடுத்து, சென்னை கடற்பரப்பை மாசுபடுத்திய எண்ணெய்க் கசிவு.  

கோடையில் 🌞🔥💦 மழையின்றி தண்ணீர் பஞ்சம்.

இப்பொழுது சென்னையின் மிக முக்கியமான வணிக பகுதியான T.Nagar எனும் தியாகராய நகர் உஸ்மான் ரோட்டில் உள்ள சென்னை சில்க்ஸ் கட்டிடம் நேற்றிலிருந்து எரிந்து சாம்பலாகி இடிந்து விழுந்து கொண்டு இருக்கிறது.
 

பல கோடி ரூபாய் மதிப்பிலான தங்க நகைகள் கட்டிட இடிபாடுகளுக்கு இடையில் சிக்கி இருக்கிறதென்றும் சேதமின்றி அதை மீட்கும் பணி நடக்கும் என்பதை கேட்பதும் தமிழக வரலாற்றில் இதுவே முதல் முறை என்று நினைக்கிறேன்.
நல்ல வேலையாக உயிர் சேதம் ஏதும் இல்லை. ஆனால், ஒரு நாளைக்கு பல லட்சம் கோடி வருமானம் தரக் கூடிய தமிழகத்தின் தலைநகர் சென்னையின் மிக முக்கிய வணிக பகுதியான 'தி. நகர்' இப்போது 'தீ நகராக' 🔥மாறி ஸ்தம்பித்து இருப்பதால் பெரும் பொருளாதார இழப்பு ஏற்பட்டுள்ளது.
அது மட்டுமன்றி தண்ணீர் பஞ்சத்தினால் தண்ணீர் குடத்தை தூக்கிக் கொண்டு மக்கள் தெரு தெருவாக அலைந்து கொண்டும் அதை சமாளிக்க Vacation என்ற பெயரில் வேறு ஊர்களில் தஞ்சம் அடைந்திருக்கும் இந்த நேரத்தில், தீயை அணைக்க பல லட்சம் லிட்டர் தண்ணீர் உபயோகப்படுத்தப் பட்டிருக்கிறது.
'சென்னை' என்ற பெயர் வைத்திருப்பதாலோ என்னவோ சென்னை சில்க்ஸ் கட்டிடத்திற்கும் இந்த நிலைமை என்று எண்ணும் அளவிற்கு பாதித்திருக்கிறது.
ஓரிரு நாட்களில் கட்டிடம் முழுதுமாக இடிக்கப்பட போகிறது. (ஏற்கனவே பாதுகாப்பின்றி கட்டிய கட்டிடம் என்ற பட்டியலில் இக்கட்டிடம் இருக்கிறது). இதன் காரணமாக அப்பகுதி மக்களும் போக்குவரத்து மாற்றம் காரணமாக பலரும் பாதிக்கப்பட்டிருக்கின்றனர்.
கடந்த இரண்டு நாட்களாக மூச்சு விடக்கூட முடியாத அளவுக்கு புகையும் வெப்பமும் உள்ள கட்டிடத்தில் மீட்பு பணியில் ஈடுப்பட்டு, அடர்த்தியாக கட்டிடங்கள் உள்ள அந்த பகுதியில் மேலும் தீ பரவி மிக பெரிய அழிவிலிருந்து காப்பாற்றும் நூற்றுக்கணக்கான தீ அணைப்பு வீரர்கள் மற்றும் மீட்பு குழுவினரை பாராட்டியே ஆக வேண்டும்.👍👏
சோதனை மேல் சோதனை போதுமடா சாமி 🙏🙏🙏
சென்னை மீண்டு வரும் !!!

அனிதா காயத்ரி 
சென்னை. 



👍


அணித காயத்ரி