Saturday, March 31, 2012

காதலியுங்கள், ஆனால்...

வாழ்க்கையை அழகாக்கும் வலிமை படைத்த மிகச் சில விஷயங்களில் காதலும் ஒன்று.

'உலகின் மிக அழகான பொருட்களை தொட்டோ, பார்க்கவோ முடியாது' என்கிறார் ஹெலன் கெல்லர்.

அழகானவை பொருட்களல்ல, உணர்வுகளே என்பதையே அவருடைய வார்த்தைகள் உணர்த்துகின்றன.

அன்பு செய்வதும், அன்பு செய்யப்படுவதும்தான் உலகின் உன்னதமான விஷயங்கள் என்பதில் சந்தேகமில்லை. அந்த அன்பின் ஒவ்வோர் பக்கத்திலும் ஒவ்வோர் வாசனை. இளைஞர்களின் வாழ்க்கைப் பக்கத்தில் அதிகமாய் வீசும் வாசனை, காதல்.

காதலும், காதல் சார்ந்த இடங்களும்தான் இளைஞர்களின் எல்லைக் கோடுகள். காதல் அவர்களுடைய வாழ்க்கையை அவர்கள் கண்களுக்கே ரொம்ப அழகானதாக மாற்றித் தருகிறது.

ஓர் இளைஞனும், அவனுடைய தந்தையும் ரெயிலில் பயணம் செய்து கொண்டிருந்தார்கள். ஜன்னல் வழியே தெரிந்த காட்சிகள் இளைஞனை உற்சாகம் கொள்ளச் செய்தன.

'வாவ்... மரங்கள்' என்றான். 'வாவ்.. வெயில்' என்றான், 'அடடா பறவைகள் என்ன அழகு' என்றான்.

அருகில் இருந்தவர்கள் எல்லாம் அவனை வித்தியாசமாய்ப் பார்த்தார்கள்.

தந்தையோ அவனுடைய கைகளைப் பற்றியபடி, எல்லாவற்றுக்கும் புன்னகையுடன் தலையாட்டிக் கொண்டிருந்தார்.

கொஞ்ச நேரத்தில் மழை தூறத் துவங்கியது.

இளைஞன் வழக்கம் போல 'ஹைய்யா, அப்பா, மழைத்துளி எவ்ளோ அழகு, அது தரையில் விழுவது அசத்தலா இருக்கு' என குதிக்க ஆரம்பித்தான்.

அருகில் இருந்தவருக்கு பொறுக்கவில்லை.

பையனோட அப்பாவைப் பார்த்து, 'பையனுக்கு... மூளை...' என்று இழுத்தார்.

தந்தை இல்லையென அவசரமாய் தலையாட்டிக் கொண்டே சொன்னார், 'என் பையனுக்கு நேற்று வரைக்கும் பார்வையில்லை. இப்போதான் ஆபரேஷன் பண்ணி பார்வை வந்திருக்கு. இதான் பார்வை கிடச்சப்புறம் அவன் செய்ற முதல் பயணம். அதான் அவனுக்கு எல்லாமே புதுசா இருக்கு, மன்னிச்சுக்கோங்க'.

காதலும் இப்படித்தான்.

காதல் ஒரு மனிதனுடைய உள்ளத்தில் விதையாய் விழுந்த உடன் அவனைச் சுற்றிய வாழ்க்கை அழகான மலர்களைச் சொரிய ஆரம்பித்து விடுகிறது. அதுவரை சாதாரணமாய் இருந்த விஷயங்கள் எல்லாம் அவனுக்குள் அழகியலைப் போதிக்கும் மகத்துவமான விஷயங்களாகி விடுகின்றன.

தமிழனுக்கும் காதலுக்குமான தொடர்பு இன்று நேற்று வந்ததல்ல. கல்தோன்றாக் காலத்திலேயே தோன்றிய காதலை, சொல் தோன்றிய காலத்திலேயே சொல்லி மகிழ்ந்தனர் தமிழர்.

சந்தேகம் இருந்தால் ஏதேனும் ஒரு பண்டைய இலக்கியத்தை தூசு தட்டிப் பாருங்கள். உள்ளேயிருந்து காதல் உதிரும்.

இவ்வளவு அழகான காதலை பலரும் விமர்சிக்கக் காரணம் என்ன? வெறுக்கக் காரணம் என்ன? பதட்டப்படக் காரணம் என்ன? அது தீண்டக் கூடாத விஷயம் என பதறக் காரணம் என்ன...?

முக்கியமான விஷயம், உண்மைக் காதலுக்கு இடையே வளரும் காதல் போன்று தோற்றமளிக்கும் களைகள்.

'காதலிக்க மறுத்த காதலியை வெட்டிக் கொன்றான் காதலன்', 'காதல் ஜோடி தற்கொலை', 'காதலித்த பெண் மண்ணெண்ணை ஊற்றிப் படுகொலை', 'காதலித்து திருமணம் செய்த நாலே மாதத்தில் விவாகரத்து' என்றெல்லாம் வரும் தகவல்கள் காதலைக் கொச்சைப்படுத்துகின்றன.

அதனால்தான் உண்மையான காதலைக் கூட சமூகம் சந்தேகக் கண்ணோடு பார்க்கிறது.

இளைஞர்கள் பல வேளைகளில் `உடல் ரீதியான ஈர்ப்பை' க் கண்டு 'இதுதாண்டா காதல்' என நினைத்து விடுகிறார்கள். அப்புறம் உடல் சிந்தனைகளிலேயே மூழ்கி நீச்சலடிக்கவும் செய்கிறார்கள்.

'காம நினைவுகளின்போது மூளையின் குறிப்பிட்ட பகுதி தூண்டப்படுகிறது. கோகைன் போன்ற போதைப் பொருளை உட்கொண்ட மூளையும், காம சிந்தனை நிறைந்த மூளையும் ஒன்று போல இருக்கும். அது உண்மையான நபரைப் பார்க்காமல், இச்சையை நோக்கியே சிந்தனையைச் செலுத்தும்' என்கிறார் ஜுடித் ஆர்லோப் எனும் உளவியல் மருத்துவர் மற்றும் எழுத்தாளர்.

காமம் ஒரு நபருடைய மேனி எழிலைப் பார்த்து வருவது. கட்டுமஸ்தான உடலையோ, நளினமான உடலையோ பார்த்து தூண்டப்படுவது.

வந்திருக்கிறது காதலா, இல்லை ஈர்ப்பா என்பதை முதலில் புரிந்துகொள்ள வேண்டும். அப்போதுதான் இதை தொடரலாமா, அல்லது விடலாமா என முடிவெடுக்க முடியும்.

உடலையும், அழகையும் மட்டுமே உங்களுடைய கண்கள் பார்க்கிறதா? சாதாரணமா பேச முடியலையா? அவிழ்த்து விடப்பட்ட ஆட்டுக் குட்டிகளைப் போல உங்கள் பார்வை அழகுப் பிரதேசங்களில் இலக்கில்லாமல் ஓடித் திரிகிறதா?

அது காதலல்ல, உடல் ஈர்ப்பு.

பேசிக்கொண்டிருப்பதை விட சில்மிஷம் சுவாரசியமாய் இருக்கா? பாலியல் சிந்தனைகள் எப்போதும் இருக்கா? உங்கள் பேச்சிலும், மெயிலிலும், எஸ்.எம்.எஸ்.சிலும் பாலியல் சார்ந்தவையே ஆக்கிரமித்திருக்கிறதா?

உஷார், உங்கள் காதல் இனக்கவர்ச்சியின் சிக்னலில் இருக்கிறது.

பேசும் போது எப்படிப் பேசறீங்க?

'வானவில்லைக் குறுக்காக வெட்டி ரிப்பனாகக் கட்டும் விஷயங்களையா?' அல்லது யதார்த்தமான பிரச்சினைகள், நிகழ்வுகளையா?

வெறும் கற்பனைக் கயிறில் பட்டம் விட்டால், அது உண்மைக் காதலல்ல.

உண்மையான காதலில் நட்பு நிச்சயம் உண்டு. ஒருவேளை உங்கள் காதலில் நட்பின் அம்சம் நீர்த்துப் போயிருந்தால், அந்தக் காதலைக் கொஞ்சம் அவசரமாக பரிசீலனை பண்ணுங்கள்.

உண்மையான அன்பு, இணைந்து நேரம் செலவிட விரும்பும். ஆனால் அது பாலியல் சார்ந்தவையாய் இருப்பதில்லை. பேசிப் பேசி நேரம் போவதே தெரியாது. ஆனால் அது பாலியல் சார்ந்த பேச்சாய் இருக்க வேண்டும் என்பதில்லை.

அடுத்தவருடைய உணர்வுகளை, சிந்தனைகளை, விருப்பங்களை, சோகங்களை எல்லாம் அது காது கொடுத்துக் கேட்கும். உண்மையான பரிவுடன் ஆலோசனைகள் சொல்லும். உண்மையில் அடுத்த நபருடைய இடத்தில் தன்னை வைத்துப் பார்ப்பதில் காதல் தனது உண்மை முகத்தை வெளிக்காட்டும்.

அடுத்தவரை வாழ்வில் முன்னேறச் செய்ய வேண்டுமென ஊக்கப்படுத்துவதையும், தொடர்ந்து ஆதரவு நல்குவதையும் காதல் சிறப்புறச் செய்யும்.

'எக்ஸாம் கெடக்குது.. வாடா சினிமா போலாம்' என்பது உண்மைக் காதலல்ல.

'நல்லா எக்ஸாம் எழுது, பேனா பென்சில் எடுத்துட்டியா? படிச்சியா?' என அக்கறையாய் விசாரிப்பதில் அது மலரும்.

அதேபோல தப்பான காதல் குடும்பத்தினரை விட்டு விலகியே இருக்கத் தூண்டும். வெளிப்படையாய் இருக்க மறுக்கும் காதலுக்குள் சில மர்மங்கள் இருக்கலாம்.

மால்கம் கிளாட்வெல் தனது 'பிளிங்க்' எனும் நூலில் குறிப்பிடும் விஷயம் சுவாரசியமானது. நம்முடைய உள்ளுணர்வு ஒரு விஷயத்தை முந்திரிக் கொட்டை மாதிரி முன்னால் வந்து எச்சரிக்கும் இல்லையா? 'அது அக்மார்க் உண்மை, அதன்படி நடந்துக்கோங்க' என்பதை அவருடைய நூல் வலுவாக முன்வைக்கிறது.

'பார்ட்டி சரியில்லையே' என உள்மனம் எச்சரித்தால் உடனே ஒரு முற்றுப்புள்ளி போட்டு விடுங்கள்.

'உண்மை கசக்கும், ஆனால் நிலைக்கும்'.

காதலைப் பொறுத்தவரை சிக்கல் பொய்யில் துவங்கும்.

'எப்படியாவது ஆளைக் கவுக்கணும்பா' என பொய்கள் சரசரவென ஓடி வரும். கல்யாணத்துக்கு அப்புறம் சாயம் வெளுக்கும். அதுதான் காதலில் விழுகின்ற முதல் ஓட்டை.

ஓட்டை விழுந்த படகு பயணத்துக்கு லாயக்கற்றதாகி விடும்.

நம்பிக்கை உடைவதைப் போல உறவுகளின் இடையேயான விரிசல் வேறு இல்லை.

உண்மையான காதலுக்கு சில அற்புதமான குணாதிசயங்கள் உண்டு. உண்மைக் காதல் நிஜங்களை அதன் உண்மையான இயல்புகளோடு ஏற்றுக் கொள்ளும், முரண்டு பிடிக்காது. உண்மைக் காதல் அடுத்தவருடைய வலிகளில் துடிக்கும், வளர்ச்சியில் பறக்கும், தோல்வியில் துவளும். அடுத்த நபர் விலகிவிட்டாலும் கூட.

உண்மைக் காதல் ஒரு நீண்டகால ஒப்பந்தம். தற்காலிகத் தேவைகளுக்கான அடைக்கல நிழல் அல்ல.

காதல் நமது தோளில் உட்கார்ந்திருக்கும் பறவை போல என்பார்கள். இறுகப் பிடித்தால் இறந்து விடும். பிடிக்க நினைத்தால் பறந்து விடும். சுதந்திரமாய் விட்டால் தோள்களிலேயே தஞ்சமடையும்.

காதலனும், காதலியும் சுதந்திரமாய் உணர்வது காதலில் மிக முக்கியம்.

காதல் என்பது அன்பின் நிலை. அந்த அன்பு நிரம்பியிருப்பவர்கள் மற்றவர்கள் மீதும் அன்பும் கரிசனையும் காண்பிப்பார்கள். அடுத்த நபரிடம் மரியாதை செலுத்துவார்கள். செயல்களில் பணிவும் நாகரீகமும் மிளிரும், மன்னிப்பு மலரும், ஈகோ விடைபெறும்.

இவை எல்லாம் இல்லையேல் உள்ளே உள்ள அன்பு உண்மையா? என கேள்வி எழுப்புங்கள்.

ஒரு சின்னக் கதை...

உயிருக்குள் உயிர் பொதிந்த காதலர்கள் அவர்கள். எல்லா காதலர் தினத்திலும் காதலிக்கு ஸ்பெஷல் பூங்கொத்தை பரிசளிப்பான் காதலன். காதல் வளர்ந்து திருமணமானது. வருடங்கள் வளர வளர காதலும் வளர்ந்தது. பூங்கொத்தும், பிரியமும் தொடர்ந்தது. இந்தக் காதலை மரணம் கூட பிரிக்கக் கூடாதென மன்றாடினர் இருவரும். ஆனால் ரணத்தின் தேரேறி மரணம் ஒருநாள் வந்தது. காதலன் மறைந்தான், காதலி உறைந்தாள்.

அடுத்த காதலர் தினம் துயரத்துடன் வந்தது. அவளுடைய அழுகை அணை உடைத்தது. அவனில்லாத முதல் காதலர் தினம் அது. படுக்கையில் புரண்டு கண்ணீர் விட்டாள். திடீரென கதவு தட்டும் ஓசை. வாசலில் பூங்கொத்துடன் ஒருவன். பூங்கொத்தை வாங்கினாள்.

இறந்து போன காதலன் அனுப்பியிருந்தான்.

பூங்கொத்தில் ஒரு வாசகம். 'மரணம் உயிரைத்தான் பிரிக்கும், காதலையல்ல. நான் உன்னை நேசிக்கிறேன்'.

அவளுக்கோ கோபம்.

பூ அனுப்பிய கடைக்காரரிடம் சென்றாள்.

'வெந்த புண்ணில் வேலைப் பாய்ச்சுகிறாயா?' என சீறினாள்.

அவன் நிதானமாய்ச் சொன்னான்.

'அம்மா, உங்க வீட்டுக்காரர் ரொம்ப வருஷத்துக்கு முன்னாடியே ஒரு அக்ரீமென்ட் போட்டுக்கிட்டாரு. எல்லா காதலர் தினத்துக்கும் உங்க வாசலில் ஒரு பூங்கொத்து வைக்கச் சொல்லி பணம் கொடுத்தாரு. ஒருவேளை நான் நேரடியா கடைக்கு வந்து பூ தேர்வு செய்யலேன்னா, நான் இறந்துட்டேன்னு அர்த்தம். ஆனாலும் நீ பூங்கொத்து கொடுக்கிறதை நிறுத்தக் கூடாது. ஒருவேளை மரணம் வந்து அவளையும் சந்தித்தால் கடைசியாய் ஒருமுறை அவள் கல்லறையில் பூங்கொத்தை வை.

எப்போதும் கடிதத்தில் தவறாமல் எழுது - 'மரணம் உயிரைப் பிரிக்கும், காதலையல்ல'... என்று.

இதாம்மா நடந்தது' அவன் சொன்னான்.

அவள் அழுதாள். அவளுடைய கண்ணீர்த் துளிகள் காதலில் கரைந்து பெருமிதம் அடைந்தன.

உண்மைக் காதல் ஆழமானது.
காதலின் உண்மை வேர்களில் தெரியும், பூக்களில் அல்ல.
போலிகளைப் புறக்கணியுங்கள்.
உயிரில் உலவும் உண்மை
அதுவே காதலின் தன்மை!


சேவியர்

Thursday, March 29, 2012

காணாமல் போன சிட்டுக்குருவிகள்

நடுத்தர வயதை கடந்தவர்கள் சிறுவயதில் பார்த்து பரவசப்பட்ட ஒரு பறவையினம்தான் சிட்டுக் குருவி. மார்ச் 20 சிட்டுக்குருவிகள் தினம். சிட்டுக்குருவிகளை பாதுகாக்கவே இப்படி ஒரு தினத்தை உருவாக்கியிருக்கிறார்கள்.

வெளிநாடுகளில் சிட்டுக்குருவியை வீட்டுக்குருவி என்கிறார்கள். பிரிட்டனில் உள்ள 'ராயல் பறவைகள் பாதுகாப்பு சங்கம்' உலக அளவில் அழிந்துவரும் 39 பறவைகள் பட்டியலில் சிட்டுக்குருவியையும் சேர்த்து உள்ளது. இந்தியா உள்பட எல்லா நாடுகளிலும் சிட்டுக்குருவி எண்ணிக்கை அதிர்ச்சி தரும் வகையில் குறைந்து உள்ளது. 'குருவிகளை காப்பாற்றுங்கள்' என்ற இயக்கம் பல நாடுகளில் விஸ்வரூபம் எடுத்திருக்கிறது. வீட்டுக்குருவி இங்கிலாந்தின் கலாச்சார அடையாளங்களில் ஒன்று. குருவிகள் மாயமாகி விடுவதற்கான காரணம் யாருக்கும் தெரியவில்லை.

தானியங்கள் பயிரிடும் முறையில் ஏற்பட்ட மாற்றம், பூச்சி கொல்லி மருந்துகளின் உபயோகம் போன்றவை குருவிகளுக்கான உணவை குறைத்து விட்டன. வீடு கட்டும் முறையும் ஒரு காரணம். முன்பெல்லாம் விசாலமான வீடுகளை கட்டினோம். வீட்டில் குருவிகள் கூடு கட்டுவதற்கும் இடம் இருந்தது. இன்று நாமோ குருவிக்கூடு போல் சிறிய வீட்டில்தான் வாழ்கிறோம். பிறகு எப்படி குருவிக்கு இடம் இருக்கும்?

இதுமட்டுமல்ல குருவிகள் அழிவுக்கு ஈயமில்லாத பெட்ரோல், செல்போன் உபயோகமும் முக்கிய காரணம். வாகனங்களுக்கு பயன்படுத்தும் 'அன்லீடட்' பெட்ரோலில் உள்ள 'பென்சீன்' மற்றும் 'மினரல் பெர்ஷியா பியூடைல் ஈதர்' என்ற வேதிப்பொருள், பறவைகளுக்கு உணவாகக்கூடிய முக்கியமான பூச்சிகளை கொன்று விடுகிறது. இதனால் பறவை இனங்கள் உணவு பிரச்சனையில் சிக்கித்தவிக்கின்றன. இதேபோல் செல்போனில் இருந்து வெளியேறும் மின்காந்த அலைகள் குருவிகளின் இதயத்துடிப்பில் பாதிப்பை ஏற்படுத்துகின்றன. சின்ன சிட்டுக்குருவி அழிந்து வருவதற்கு நாம் இத்தனை கவலைப்பட வேண்டுமா? வேண்டும். சிட்டுக்குருவிகள் நம் வாழ்வுக்கு ஆதாரமானவை. காடுகளில் வாழும் பறவைகள், விலங்குகள் சுற்றுச்சூழலுக்கு எவ்வளவு முக்கியமோ அதுபோல் நகர்புற வாசிகளான நமக்கும் நாம் வாழும் சுற்றுச்சூழலின் தரத்தை அறிந்து கொள்ளும் அளவுகோல் சமூக பறவையான சிட்டுக்குருவிகளே.

இமயமலையில் 14 ஆயிரம் அடி உயரத்திலும், பூமிக்கு அடியில் 2 ஆயிரம் அடி ஆழத்தில் உள்ள நிலக்கரி சுரங்கத்திலும் வாழும் தகுதி கொண்டவை சிட்டுக்குருவிகள். நாம் சுவாசிக்கும் அதே காற்றைத்தான் சுவாசிக்கின்றன. எங்கும் பறந்து திரியும் இந்த பறவைகளுக்கு அழிவு என்பது சுற்றுச்சூழலின் மோசமான பாதிப்பு ஏற்பட்டிருப்பதற்கான எச்சரிக்கை மணி.      

Wednesday, March 28, 2012

கிரெடிட் கார்டு: 6 புத்திசாலித்தனமான வழிகள்!

இன்று கிரெடிட் கார்டு என்பது அந்தஸ்தின் அடையாளமாகிவிட்டது. தேவையிருக்கிறதோ, தேவையில்லையோ பலரும் கிரெடிட் கார்டு பயன்படுத்த விரும்புகிறார்கள்.

உங்களுக்கும் அந்த ஆசையிருந்தால் கிரெடிட் கார்டை பயன்படுத்தும்போதும் பின்வரும் 6 புத்திசாலித்தனமான விஷயங்களைக் கவனத்தில் வையுங்கள்...

1. 'பில்லிங் சைக்கிள்'

ஒவ்வொரு கிரெடிட் கார்டுக்கும் ஒரு 'பில்லிங் சைக்கிள்' உள்ளது. நீங்கள் எப்போதும் உங்கள் நிலுவைத் தொகையை முழுமையாகச் செலுத்திவிடுவீர்கள் என்றால், 'பில்லிங்' சுழற்சியின் ஆரம்பத்தில் நீங்கள் வாங்கும் பொருட்களுக்கு ஓர் இலவச 'கிரெடிட்' காலத்தை அனுபவிக்கலாம்.

2. குறைந்தபட்சத் தொகை

நீங்கள் குறைந்தபட்சத் தொகையைச் செலுத்திவிடுவது, மீதமுள்ள தொகையை கடனாகக் கருதி அதற்கு வட்டி விதியுங்கள் என்று வங்கிக்குத் தெரிவிப்பதாக அமையும். கிரெடிட் கார்டு மீதான கடன்களுக்கான வட்டி விகிதம் பொதுவாக அதிகம் என்பதை ஞாபகத்தில் வையுங்கள்.


3. உஷாராக வேண்டிய நேரம்

கிரெடிட் கார்டு உரிமையாளர் குறைந்தபட்சத் தொகையைச் செலுத்தாவிட்டால், அதுகுறித்து அவருக்கு ஓர் எச்சரிக்கை விடுக்கப்படும். கார்டு வழங்கல் விதிகளின்படி, அவர் கடனைத் திருப்பிச் செலுத்தத் தவறியவராகக் கருதப்படுவார். அப்போது அவர் உஷாராகிக்கொள்ள வேண்டும்.

4. பணம் எடுக்கும்போது...

கிரெடிட் கார்டை பயன்படுத்திப் பணம் எடுப்பதெல்லாம், அவ்வாறு எடுத்த நாளில் இருந்து கடனாகக் கருதப்படும். அம்மாதிரியான கடன்களுக்கு எந்த `இலவச கிரெடிட் காலமும்' இல்லை என்பது உங்கள் நினைவிருக்கட்டும்.

5. தனிநபர் கடனாக மாற்றலாம்

கிரெடிட் கார்டு நிலுவைத் தொகையைத் திருப்பிச் செலுத்த முடியாமல் அவஸ்தைப்படுகிறீர்களா? அதுபோன்ற நிலையில், உங்கள் நிலுவையை ஓரளவு குறைந்த வட்டியில் தனிநபர் கடனாக மாற்றுவதற்குச் சம்பந்தப்பட்ட வங்கி முன்வரலாம். நீங்கள் அதை வழக்கமான கடனைப் போல பல்வேறு தவணைகளில் செலுத்தி முடிக்கலாம். உங்களுக்கு அந்த முறை சரியாக வரும் என்று தோன்றினால் உடனே வங்கி நிர்வாகிகளிடம் பேசுங்கள்.

6. கிரெடிட் அளவு

கிரெடிட் கார்டை பயன்படுத்தி நீங்கள் அதிகமாகச் செலவழிப்பது போலத் தோன்றினால் உங்கள் கார்டின் கிரெடிட் அளவைக் குறைக்கும்படி கார்டு நிறுவனத்திடம் நீங்கள் கேட்கலாம்.

கிரெடிட் கார்டு குறித்து அலர்ஜி அடையத் தேவையில்லை. புத்திசாலித்தனமாகவும் கவனமாகவும் பயன்படுத்தினால் அது தக்க சமயத்தில் உதவும் ஒரு சிறந்த பொருளாதாரத் துணைவன் என்கிறார்கள் நிபுணர்கள். என்ன சரிதானே?

Monday, March 26, 2012

கல்வியால் ஆய பயன்!

ஆண்டு இறுதித் தேர்வு வந்தாலே போதும், பள்ளி மாணவர்கள் எல்லாம் எதோ கொள்ளி வாய்ப் பிசாசு கொல்லையில் காத்திருப்பது போல வெலவெலக்கத் துவங்குவார்கள். அரக்கப் பரக்க ஓடுவார்கள். கண்களில் ஒரு கிலி எப்போதுமே எட்டிப் பார்த்துக் கொண்டிருக்கும். பெற்றோரைப் பற்றிச் சொல்லவே வேண்டாம். ஏதோ ஒரு கொடிய நோய் வந்திருப்பது போல அவர்களுடைய பதட்டம் இருக்கும்.

'பையனுக்கு எக்ஸாம் இருக்குல்ல...' என்றுதான் பேச்சையே ஆரம்பிப்பார்கள். சாப்பாடு, தூக்கம் எல்லாம் மறந்து போய் கண்ணில் விளக்கெண்ணை ஊற்றி விழித்திருப்பார்கள். அந்தப் பரபரப்பை அப்படியே பிள்ளைகளுடைய தலையிலும் ஏற்றி விடுவார்கள். ஒரு துரும்பைத் தூக்கி தூரமாய்ப் போடும் வேலையைக் கூட பிள்ளைகளுக்குக் கொடுக்க மாட்டார்கள். 'படி... படி' என்று பிள்ளைகளுடைய காதைச் சுற்றி பெற்றோரின் குரல் ஸ்டீரியோ சரவுண்ட் சிஸ்டம் போல ஒலித்துக் கொண்டே இருக்கும்.

அத்துடன் விட்டாலாவது பரவாயில்லை. மாமா பையன் மகேஷை விட நீ ஒரு மார்க்காவது அதிகம் வாங்கணும்டா. அத்தை பொண்ணு இலக்கியாவைக் காட்டிலும் அரை மார்க்காவது அதிகம் வாங்கணும்டி என தங்கள் பழி தீர்க்கும் படலத்துக்கு பிள்ளைகளை வைத்துக் காய் நகர்த்துவார்கள்.

'கிளாஸ்ல நீதான் பர்ஸ்ட்டா வரணும், ஸ்டேட் ரேங்க் வரணும், கணக்குல நூத்துக்கு நூறு வாங்கணும்...' இப்படி இந்த தேர்வுக் காலம் முழுவதும் மாணவர்களைச் சுற்றி எப்போதும் இல்லாத அழுத்தமான சூழல் உருவாகிவிடும். பெரும்பாலும் இத்தகைய அழுத்தங்களில் விழுந்துவிடும் மாணவர்கள் தங்கள் திறமையை விடக் குறைவான மார்க்கையே வாங்குவார்கள் என்கிறது உளவியல்.

கல்வி ரொம்ப முக்கியமானது. ஆனால் கல்வி என்பதை மார்க் ஷீட் தீர்மானிப்பதில்லை. முன்பெல்லாம் மாணவர்கள் குருவைத் தேடி அலைந்தார்கள். ஒரு குருவைக் கண்டு பிடித்தால் அந்த குருவுடனே பல ஆண்டுகாலம் தங்கினார்கள். அங்கேயே அவர்கள் கொஞ்சம் கொஞ்சமாய் கல்வி கற்றார்கள். அப்போது கல்வி என்பது நல்லொழுக்கம், பணிவு எனும் இரண்டு படிகளைத் தாண்டியபிறகே கலைகள் கற்கும் நிலைக்கு வரும்.

`ஒரு வருடம் கல்வி. அதன்பின் தேர்வு. தேர்வு முடித்ததும் புத்தகங்களை எடைக்குப் போட்டுவிட்டு மூளையைக் கழுவிக் காயப் போடும்' இன்றைய கல்வி முறை அன்றைக்கு இல்லை. வாழ்க்கைக்குக் கல்வி எனும் அடிப்படை விஷயத்தையே அன்றைய பாடம் போதித்தது.

கல்வி என்பது ஒரு மனிதனை நாகரீகவானாக மாற்ற வேண்டும். சமூகத்தோடு இணைந்து வாழ்வதற்குரிய நல்ல பண்புகளைப் போதிக்க வேண்டும் என்பதே பால பாடம். அந்தக் கல்வி அவனுடைய வாழ்க்கைக்குத் தேவையான பொருளாதாரத்தை ஈட்டப் பயன்படுவது அடுத்த கட்டம்.

இந்த வரிசை மாறும் போதுதான் சிக்கல் உருவாகிறது. கல்வி என்பது 'வேலைக்கான சாவி' என்று இன்றைய மாணவர்கள் நினைக்கிறார்கள். சுரண்டிப் பார்த்து நம்பர் வந்தால் வெற்றி என கொண்டாடும் லாட்டரிச் சீட்டு போல சிலர் பார்க்கிறார்கள். அதனால்தான் மதிப்பெண் குறைந்து விட்டால் கற்ற கல்வியே பயனில்லாதது என கருதி விடுகிறார்கள்.

'இந்த மார்க் எடுக்கவா உன்னை விழுந்து விழுந்து கவனிச்சேன், வெளங்காதவனே' என வசவுகள் வருவதன் காரணமும் இதுதான்.

இந்த இடத்தில் ஒரு சின்ன விஷயத்தை நினைவுபடுத்த விரும்புகிறேன். நீங்கள் நன்றாகப் படித்து அதிக மதிப்பெண் எடுக்க வேண்டும் என்பதில் எனக்கு மாற்றுக் கருத்து இல்லை. காரணம் இன்றைய சமூகம் அதை எதிர்பார்க்கிறது. ஆனால் அதையே வெற்றியின் எல்லைக் கோடாகக் கருதிவிட வேண்டாம் என்பதே நான் சொல்ல வரும் விஷயம்.

மாநிலத்திலேயே முதல் மாணவனாக வரவேண்டும் எனும் ஆர்வம் ஆயிரம் பேருக்கு இருக்கலாம். ஓரிருவருக்கு அந்த வாய்ப்பு கிடைக்கிறது. அதற்காக மிச்சம் தொள்ளாயிரத்துத் தொண்ணூற்றுச் சொச்சம் பேரும் தோல்வியடைந்ததாக அர்த்தமில்லையே? எனவே வெற்றி என்பதை மதிப்பெண் கொண்டு அளக்காதீர்கள். உங்கள் குணாதிசயங்கள், இயல்புகள், அறிவு, தன்னம்பிக்கை இவற்றைக் கொண்டு அளக்க வேண்டும்.

தன்னம்பிக்கை உள்ள இளைஞன் பள்ளியில் தோற்றால் கூட வாழ்க்கையில் வெற்றி பெறுவான். அவன் தன்னுடைய கல்வியின் மூலமாகப் பெற்ற மூலதனம் அவனுடைய தன்னம்பிக்கை. காகிதத்தில் எழுதி வைத்த மதிப்பெண் அல்ல.

 அறிவியல் மேதை ஐன்ஸ்டீனை உலகமே கொண்டாடுகிறது. காரணம் அவருடைய அறிவியல் கண்டுபிடிப்புகள். ஆனால் அவர் படிப்பில் சுமார்தான் தெரியுமா? ஐன்ஸ்டீனை உலகுக்கே தெரியும். அவருடைய காலத்தில் ஸ்டேட் பர்ஸ்ட் வாங்கிய மாணவன் பெயர் உங்களுக்குத் தெரியுமா?

ஐசக் நிïட்டனைப் பற்றி நமக்கெல்லாம் தெரியும். அவரொன்றும் வகுப்பில் முதல் மாணவனாக வந்தவரல்ல. அவருடைய பள்ளியில் முதல் மாணவன் யார் என்பது யாருக்காவது தெரியுமா?

தாமஸ் ஆல்வா எடிசனைத் தெரியாதவர்கள் இருக்க முடியாது. அவர் `முட்டாள்' என்று பள்ளிக்கூடத்திலிருந்து வெளியேற்றப்பட்டவர். அவர் காலத்தில் படித்து முதல் மாணவனாக வந்து பதக்கம் குத்திக் கொண்டவர்களில் ஒருவர் பெயரைச் சொல்லுங்கள் பார்ப்போம்.

வாழ்க்கைதான் ஒரு மனிதனுடைய வெற்றியைத் தீர்மானிக்கிறது. வாழ்க்கையை அவன் எப்படி அணுகு கிறான் என்பதில்தான் வெற்றி தோல்வி இருக்கிறது. வாழ்க்கையில் வெற்றியடைந்தவனிடம் யாரும் போய் `உனக்கு ஸ்கூல்ல என்ன மார்க்?' என கேட்பதில்லை. வாழ்க்கையில் தோல்வியடைந்தவன், `நான் ஸ்கூல்ல கோல்டு மெடலிஸ்ட்டாக்கும்' என்று சொல்லிக் கொள்வதிலும் பயனில்லை! போன வருஷம் பதக்கம் வாங்கியவனைக் கூட யாரும் நினைவில் வைத்திருப்பதில்லை.

கல்வி நமக்கு அறிவைத் தரவேண்டும். வாழ்க்கையில் நிகழ்கின்ற சிக்கல்களைப் பக்குவத்துடன் கையாளும் மனநிலையைத் தரவேண்டும். உலகமும் அதைத் தான் எதிர்பார்க்கிறது. அதனால்தான் படித்தவன் ஒருவன் தப்பு செய்யும் போது, 'படிச்சவன் மாதிரியாய்யா நடந்துக்கறே' எனும் கோப வாக்கியங்கள் எழுகின்றன.

கல்வியில் தோற்றதற்காகவோ, மதிப்பெண் குறைந்ததற் காகவோ ஒருவன் தற்கொலை செய்து கொள்கிறான் என்று வைத்துக் கொள்ளுங்கள். அவனுடைய கல்வியால் என்ன பயன்? அவனுடைய கல்வி அவனுக்குத் தேவையான தன்னம்பிக்கையையும், மன வலிமையையும் தரவில்லை! வாழ்க்கையை எதிர்கொள்ளும் மனதைத் தரவில்லை. மொத்தத்தில் அவனை ஒரு கோழையாய் உருவாக்கியிருக்கிறது.

கல்வி எப்போதும் முடிவதில்லை. கடைசிப் பரீட்சையுடன் அது முடிகிறது என்று கருதுவோர் அறிவிலிகள். கல்வி வாழ்வின் கடைசி நாள் வரை தொடர்ந்து கொண்டே இருக்கும். வாழ்வின் ஒவ்வோர் அனுபவமும் நமக்கு ஒரு பாடத்தைச் சொல்லித் தரும். அந்த அனுபவப் பாடத்துக்கு வலிமை அதிகம்.

நீதிக் கதைகளையும், பஞ்ச தந்திரக் கதைகளையும் நமக்கு ஏன் கற்பிக்கிறார்கள்? நமது குணாதிசயம் மனித மதிப்பீடுகளின் அஸ்திவாரத்தில் கட்டி எழுப்பப்பட வேண்டும் என்பதற்காகத்தான். வாழ்வின் ஒவ்வோர் தருணத்திலும் சரியான முடிவுகளை நாம் எடுக்க வேண்டும் என்பதற்காகத்தான். சக மனித கரிசனையில் வாழவேண்டும் என்பதற்காகத்தான்.

இந்த சிந்தனைகளை மாணவர்கள் முதலில் மனதில் இருத்த வேண்டும். பெற்றோர் அதை பிள்ளைகளுக்குக் கற்றுக் கொடுக்க வேண்டும். ஆசிரியர்கள் அதை மாணவர்களிடம் கட்டியெழுப்ப வேண்டும். அப்போதுதான் கல்வி தன் முழுப் பயனை அடையும்.

வளமான தேசத்தை கல்வியறிவு பெற்ற மக்களைக் கொண்டு தான் எடை போடுவார்கள். அதிகம் கல்வியறிவு பெற்ற மக்கள் இருக்கும் தேசம் வளர்ச்சியான பாதையை நோக்கிச் செல்கிறது. கல்வியறிவில் பின்தங்கும் தேசம் தனது தோல்விகளை நோக்கிய பயணத்தையே தொடர்கிறது.

கல்வி நமது மூடநம்பிக்கைகளை அகற்றி அனைத்தையும் அறிவுப்பூர்வமாகவும், உணர்வுப்பூர்வமாகவும் அணுகும் மன நிலையைத் தரவேண்டும். கண்மூடித்தனமாக அனைத்தையும் பின்பற்றாமல், அனைத்தையும் தெளிவான மனநிலையில் கேள்வி கேட்கும் அறிவையும் அது தரவேண்டும். அது மாணவர்களிடையே பொறாமையையும், வெறுப்பையும் வளர்க்கக் கூடாது. ஒருவரை விட இன்னொருவர் சிறந்தவர், உயர்ந்தவர், வல்லவர் எனும் சிந்தனைகளை உருவாக்கும் பணியைச் செய்யவே கூடாது.

அதே போல கல்வி என்பது வெறுமனே வாசித்து விட்டு, அதைப் பிரதி எடுக்கும் ஜெராக்ஸ் வேலையைச் செய்யக் கூடாது. புரிந்து படிக்கும் நிலை உருவாக வேண்டும். கல்வி முறையின் மாற்றம் மாணவர்களை, தலைமைப் பண்புகள், குழுவாய் இணைந்து செயல்படும் தன்மை, நிர்வாகத் திறமை போன்றவற்றிலும் சிறந்தவர்களாக்க வேண்டும் என வல்லுநர்கள் கருத்து தெரிவிக்கின்றனர்.

பாடங்கள் வசீகரிக்காத போது மாணவர்கள் அதை அரவணைப்பதில்லை. மாணவர்களுடைய விருப்பம் பெரும்பாலும் பெற்றோரால் ஏற்றுக் கொள்ளப்படுவதுமில்லை. `நாளைக்கு நாலு பேரு மதிக்கணும்...' என்பதுதான் பெற்றோருடைய தாரக மந்திரம். அதனால் தான் குழந்தைகள் டாக்டர், என்ஜினீயர் போன்ற துறைகளை விட்டு விட்டு வேறு துறைகளைத் தேர்ந்தெடுத்தால் பெற்றோர் குதிக்கிறார்கள்.

சமூகம் தன் பங்குக்கு மன அழுத்தங்களை இளைஞர்களின் மனதில் திணிக்கிறது. மாய பிம்பங்களையே மாணவர்கள் பெரும்பாலும் பார்க்கின்றனர். வெற்றியையும் தோல்வியையும் இயல்பாக எடுத்துக் கொள்ளும் பக்குவத்தை மாணவர்களுக்கு பெற்றோரும் சமூகமும் கற்றுக் கொடுக்க வேண்டும்.

சில வேளைகளில் அந்த அழுத்தம் சக மாணவர் களிடம் இருந்தும் வருவதுண்டு. அத்தகைய நண்பர் களைவிட்டு விலகி இருக்க வேண்டியது அவசியம். ஆசிரியர்களும் மாணவர்களை விமர்சிக்காமல் அவர்களை ஊக்கப்படுத்தும் செயலையே முக்கியமாய்ச் செய்ய வேண்டும். மாணவர்களின் மன அழுத்தத்தை இத்தகைய செயல்பாடுகள் கழுவிக் கரைத்து விடும்.

கல்வி நமக்கு அறிவைத் தருகிறது. அத்துடன் நமக்கு நல்ல சிந்தனைகளும், உணர்வுகளும் இருக்கும்போதுதான் கற்ற கல்வி முழுமையடைகிறது. வெறுமனே அடைத்து வைக்கும் அறிவு, மூளையை ஒரு லைப்ரரி ஆக்கலாம். ஆனால் ஒரு முழுமையான மனிதனாக்க முடியாது. படித்தவர்கள் சமூக விரோதிகளாகவும், வங்கிக் கொள்ளையர்களாகவும், மக்களை ஏமாற்றும் மனிதர் களாகவும் மாறும் போது கல்வி கேலிக் கூத்தாகி விடுகிறது இல்லையா?

எனவே நல்ல குணாதிசயங்களையும், தன்னம்பிக்கையையும் முதலில் கற்றுக் கொள்ளுங்கள். உங்கள் மீது நம்பிக்கை வைத்து வாழ்க்கையை எதிர் கொள்ளுங்கள். விமர்சனங்களை இடது கையால் ஒதுக்கி வையுங்கள். வாழ்க்கை எல்லோருக்கும் ஆனந்தமான சாலைகளை ஆயத்தம் செய்து வைத்திருக்கிறது. நம்பிக்கையுடன் பயணியுங்கள்.

தோல்வி என்பது மரணமல்ல,
மரணம் என்பதுதான் தோல்வி!



சேவியர்

Wednesday, March 21, 2012

உருவ வழிபாடு - விவேகானந்தர் விளக்கம்!

ராஜபுதனத்தில் ஆழ்வார் என்று ஒரு சமஸ்தானம் இருந்தது. ஒரு தடவை சுவாமி விவேகானந்தர் அந்த சமஸ்தான மன்னரின் அழைப்பை ஏற்று அங்கு சென்றிருந்தார்.

விவேகானந்தரின் ஆன்மிகப் பெருமையையும், அவருடைய அறிவாற்றலையும் கேள்விப்பட்டிருந்த மன்னர், விவேகானந்தரை தனது அரண்மனையிலேயே தங்கவைத்து மிகுந்த உபசாரம் செய்தார்.

அந்த சமஸ்தான மன்னருக்குப் பொதுவாக இந்து மதத்தின் மீது பற்றும், நம்பிக்கையும் இருந்தாலும், பலவிதமான மூட நம்பிக்கைகளால் இந்து மதத்தின் சிறப்புக்கு மாசு ஏற்படுகிறது என்ற கருத்தைக் கொண்டிருந்தார்.

இந்து மதத்தில் வழக்கமாக உள்ள கடவுள்களின் திருவுருவ வழிபாடு என்பது ஓர் அர்த்தமற்ற மூடநம்பிக்கை என்பது மன்னரின் அழுத்தமான எண்ணம்.

ஒருநாள் மன்னரும், விவேகானந்தரும் இந்து மதத் தத்துவங்கள் குறித்து உரையாடிக் கொண்டிருந்தனர்.

அப்போது மன்னர் விவேகானந்தரை நோக்கி, "சுவாமி, இந்து மதத்தில் நடைமுறையில் இருக்கும் தெய்வத் திருவுருவ வழிபாட்டைப் பற்றித் தாங்கள் என்ன நினைக்கிறீர்கள்? உயிரற்ற கற்களாலும், உலோகங்களாலும் செய்யப்பட்ட தெய்வத் திருவுருவங்களில் ஏதோ மகிமை இருப்பதாக எண்ணிக்கொண்டு அவற்றுக்குப் பூஜை செய்வதும், வழிபாடு மேற்கொள்வதும் அறிவுக்கு ஒவ்வாத செயல்கள் அல்லவா? கல்லிலும், செம்பிலுமான உருவங்களில் கடவுள் குடிகொண்டிருக்கிறார் என்று நீங்கள் நம்புகிறீர்களா?'' என்று கேட்டார்.

மன்னரின் அந்தக் கேள்வியைக் கேட்டு சுவாமி விவேகானந்தர் புன்முறுவல் பூத்தார்.

மன்னருக்கு ஏற்பட்டிருக்கும் சந்தேகத்தை வெறும் வாய்விளக்கமாகக் கூறிப் போக்க முடியாது என்று அவர் நினைத்தார்.

வேறு எந்த வழியில் மன்னரின் ஐயத்தைப் போக்குவது என்று யோசித்த விவேகானந்தரின் கண்களில், சுவரில் மாட்டியிருந்த மன்னரின் தந்தையின் பெரிய திருவுருவப் படம் கண்களில் பட்டது.

"அது யாருடைய உருவப் படம்?'' என்று விவேகானந்தர் வினவினார்.

"என் தந்தையின் படம் இது'' என்றார் மன்னர்.

"இது என்ன படமா? எவ்வளவு அவலட்சணமான உருவம்! இந்தப் படத்தை இந்த இடத்தில் மாட்டி வைத்திருப்பதால் இந்த அறையின் அழகே கெட்டுப் போய்விடுகிறது. இதைக் கழற்றி சுக்குநூறாக உடைத்துக் குப்பைத் தொட்டியில் வீசுங்கள்!'' என்று கூறினார் விவேகானந்தர்.

அவர் சொன்னதைக் கேட்டு மன்னர் ஆவேசமடைந்து விட்டார்.

"சுவாமி... என்ன வார்த்தை சொல்லிவிட்டீர்கள்! இதே சொற்களை வேறு யாராவது சொல்லியிருந்தால் இந்நேரம் அவர் தலையை வெட்டி வீழ்த்தியிருப்பேன்! என் தந்தையை நான் தெய்வமாகவே கருதி வழிபட்டு வருகிறேன். அவருடைய திருவுருவப் படத்தைப் பற்றி நீங்கள் எவ்வாறு இழிவாகப் பேசலாம்?'' என்று ஆர்ப்பரித்தார்.

விவேகானந்தரோ மிகவும் நிதானமாக மன்னரை நோக்கி, "மன்னவரே, உமது தந்தை மீது எனக்கு எவ்விதத் துவேஷமும் கிடையாது. அவரை இழிவுபடுத்துவதும் எனது நோக்கமல்ல. தெய்வத் திருவுருவ வழிபாட்டைப் பற்றி உங்களுக்கு ஏற்பட்ட சந்தேகத்தை விளக்குவதற்காகவே நான் இவ்வாறு நாடகமாடினேன்.

உங்கள் தந்தையாரின் உருவப் படத்துக்கு உயிர் இல்லை. இது ஓர் ஓவியரால் வரையப்பட்ட ஓவியம்தான். இந்த ஓவியத்தினுள் உங்கள் தந்தை ஒளிந்துகொண்டிருக்கவில்லை. ஆனால் உங்கள் தந்தை மீது உங்களுக்கு இருக்கும் அன்பு, மதிப்பு, மரியாதை காரணமாக இதை ஓர் நினைவுச்சின்னமாகப் போற்றி வருகிறீர்கள். தெய்வத் திருவுருவங்களை இந்து மதத்தைச் சார்ந்த மக்கள் வழிபடுவதன் நோக்கமும் இதுதான். இறைவனை நோக்கி வழிபடும்போது இறை சிந்தனையை நோக்கி மனதை ஒன்றுபடுத்துவதற்கு அந்த உருவங்கள் பயன்படுகின்றன'' என்றார் விவேகானந்தர். சந்தேகம் நீங்கித் தெளிவுபெற்றார் மன்னர்.

Saturday, March 17, 2012

திடீர் பணக்காரன்

மனதில் கொஞ்சம் தில், கையில் ஒரு துப்பாக்கி, முகத்தை மறைக்க ஒரு கர்ச்சீப்... இது போதும் லட்சாதிபதியாக.

நல்ல மத்தியான நேரமாகப் பார்த்து ஒரு வங்கியில் புக வேண்டியது, வேலை செய்து கொண்டிருக்கும் அப்பாவிப் பணியாளனின் நெற்றியில் துப்பாக்கியை வைக்க வேண்டியது, பணத்தை அள்ளிக் கொண்டு அலேக்காகப் பறக்க வேண்டியது.

திடீர் பணக்காரர் ஆக வேண்டும் எனும் ஆவல் உந்தித் தள்ளும் போது என்னவெல்லாம் நடக்கிறது பாருங்கள். விளைவு என்ன என்பதை நான் சொல்லத் தேவையில்லை. அப்படி சுருட்டிய பணம் அவர்களுக்கு எவ்வளவு தூரம் உதவியது என்பதும் நாம் அறிந்ததே.

படிப்படியாய் வாழ்க்கையில் முன்னேறும் வழிகளெல்லாம் பலருக்கும் அலர்ஜியாகி விட்டது. 'ஓவர் நைட்ல பணக்காரர் ஆக வேண்டும்' என்பது அவர்களின் தாரக மந்திரம். அதற்கு கிடைக்கும் வழி லீகலோ, இல்லீகலோ பரவாயில்லை என்பதுதான் பதற வைக்கும் உண்மை.

பல்லில்லாத பாட்டியின் காதில் கிடக்கும் பாம்படத்தை அறுப்பது முதல், கன கம்பீரமாக இருக்கும் ஏ.டி.எம். பெட்டியையே தூக்கிச் செல்வது வரை எல்லாமே ஒரே லட்சியத்தை நோக்கியதுதான். 'விடிஞ்சா நான் பணக்காரனாகி இருக்கணும்'.

ஒரு காலத்தில் திடீர் பணக்கார மோகம் உடையவர்கள் லாட்டரி சீட்டுகளை வாங்கிக் குவித்துக் கொண்டிருந்தார்கள். அவர்கள் லாட்டரியுடன் காத்திருந்து காத்திருந்து கடைசியில் சோற்றுக்கே லாட்டரி அடிக்கும் நிலைமைக்கு வந்தார்கள். அப்புறம் சுரண்டல் லாட்டரி வந்தது. சுரண்டிச் சுரண்டி சுண்டு விரல் துண்டானதுதான் மிச்சம்.

வீட்டில் கொஞ்ச நேரம் டிவி பார்க்க உட்கார்ந்தால் என்ன கிடைக்கிறது, மனைவியின் அர்ச்சனையைத் தவிர? ஊடகங்கள் உருவாக்கி வைத்திருக்கும் அதி பயங்கரமான மாயை. ஒரு மாய உலகம். ஒரு வகையில் கிராபிக்ஸ் கொண்டு உருவாக்கிய சர்வ சக்தி பொருந்திய சுவர்க்கத்தின் மினியேச்சர்.

அங்கே அட்டகாசமான ஒரு கார் அப்பழுக்கற்ற சாலையில் ஓடுகிறது. அரை லட்சம் ரூபாயை எட்டிப் பிடிக்கும் மொபைலுடன் ஒய்யார அழகி தோள் சாய்கிறாள். அரைச் சுவர் அளவு தொலைக்காட்சியில் ஹாக்கி பார்க்கிறார், பாப்கான் கொறிக்கும் பணக்கார மனுஷன்... விளம்பரங்களும், சினிமாக்களும் இளைஞர்களின் இளகிய மனதுக்குள் கண்ணி வெடியை வைக்கும் பணியை கச்சிதமாய் செய்து விடுகின்றன.

மாதச் சம்பளத்தில் வீட்டு வாடகை கட்டி, வாயைக் கட்டி வயித்தைக் கட்டி, இல்லாத கரண்டுக்கு பில் கட்டி, போன் பில் கட்டி வாழும் வாழ்க்கையில் இதெல்லாம் சாத்தியமில்லை என நினைக்கிறார்கள் இளைஞர்கள். ஆசைக்கும், நேர்மைக்கும் இடையேயான போராட்டம் உக்கிரமடைகிறது.

பக்குவமான இளைஞர்கள் வெற்றிக்காக நேரான பாதையை தேர்ந்தெடுக்கிறார்கள். அந்தந்த துறையில் கவனம் செலுத்துகிறார்கள். புதுமையாய் என்னென்ன செய்யலாம் என யோசிக்கிறார்கள். வெற்றிகளை அடைகிறார்கள். அந்த வெற்றி ஒரு வருடத்தில் வந்தாலும் சரி, பத்து வருடங்களில் வந்தாலும் சரி. அது அவர்களிடம் தங்குகிறது. மனதை உற்சாகமூட்டுகிறது.

சிலரோ நேர்மையின் மதில் சுவரை எட்டித் தாவி விடுகிறார்கள். அவர்கள் மனித மதிப்பீடுகளை உடைத்து கொள்ளை, வழிப்பறி, ஏமாற்று என தவறான வழியில் செல்கிறார்கள். அதற்கு இடைஞ்சல்கள் வரும்போது கொலை வரைக்கும் போய் விடுகிறார்கள். தவறுகளை சிந்திக்கும் மனிதர்களிடமிருந்து தவறுகளே முளைக்கின்றன. அத்தி மரத்தில் அத்திப் பழங்களே விளையும் என்பதல்லவா விதி.

பணக்காரர் ஆகவேண்டும் எனும் ஆசையை நான் விமர்சிக்கவில்லை. ஆனால் அந்த ஆசையை மட்டும் வைத்துக் கொண்டு வலைகளில் விழுந்து விடுவதுதான் ஆபத்தானது. எப்படியாவது பணக்காரர் ஆக வேண்டும் எனும் உங்களுடைய ஆசையே சிலருடைய முதலீடு தெரியுமா?

'இன்று ஆயிரம் ரூபாய் கட்டுங்கள். அடுத்த வருஷம் ஒரு லட்சம் ரூபாய் உங்கள் கையில் இருக்கும்' எனும் கோஷங்களுக்கு இன்றைக்கும் வலிமை உண்டு. அது 'ஆஸ்திரேலியாவில் திராட்சைத் தோட்டம், அன்டார்டிக்காவில் தேக்குத் தோட்டம்' என்றெல்லாம் சர்வதேச முகம் காட்டுவதும் உண்டு. அதை நம்பி பணத்தைக் கட்டி விட்டு கையைப் பிசைந்து நிற்பவர்கள் எக்கச்சக்கம்.

'நைஜீரியன் மெயில்' ஏமாற்று வேலை இதில் உலகப் பிரசித்தம். மின்னஞ்சல் திறந்தால் உங்களுக்கு ஒரு மெயில் வந்திருக்கும். 'அதிர்ஷ்டப் பிரபுவே, உங்களுக்காக நைஜீரிய வங்கியில் ஆயிரம் கோடி ரூபாய்கள் காத்திருக்கின்றன. அதை சொந்தமாக்கிக் கொள்ள வெறும் ஐந்து லட்சம் ரூபாய்களை மட்டும் உடனே கட்டுங்கள்' என கடிதம் விரியும்.

ஆயிரம் கோடியா என வாயைப் பிளந்து சைலன்டாகப் போய் பணத்தைக் கட்டி ஏமாந்து போகும் மக்கள் ஏராளம். சமீபத்தில் நமது நாட்டில் கூட ஒருவர் பணத்தைக் கட்டி கண்ணைக் கசக்கிய நிகழ்வு நடந்தது.

'என்னோட அக்கவுண்டில் இருக்கும் பணத்தை நான் எடுக்க முடியாது, டிரான்ஸ்பர்தான் செய்ய முடியும். அதற்கு ஒரு நைஜீரியன் அக்கவுண்ட் வேணும்.' அல்லது 'எல்லாம் தங்கமாக இருக்கிறது அதை பணமா மாற்ற கொஞ்சம் முன்பணம் வேண்டும்', அல்லது `உங்களுக்கு ஒரு கார் பரிசு விழுந்திருக்கிறது, இந்தியாவுக்கு அனுப்ப பேக்கிங் சார்ஜ் அனுப்புங்கோ' இப்படி ஏதோ ஒரு விதத்தில் மெயில் வரும்.

சிரித்துக் கொண்டே 'டெலிட்' பட்டனை அமுக்குவது மட்டுமே நீங்கள் செய்ய வேண்டிய ஒரே வேலை. கொஞ்சம் ஏமாந்து, 'முயற்சி செய்து பார்ப்போமே' என பணத்தைக் கட்டினால் உங்கள் பணம் காலி. அது உங்களுக்கு திரும்ப வரப் போவதில்லை என எல்லா சாமிகளையும் அடித்து சத்தியம் செய்து விடலாம்.

மத்திய ஐரோப்பாவிலுள்ள ஜெரி பெஸுவஸ்கி எனும் 72 வயது முதியவருக்கும் இப்படி அபத்தம் நேர்ந்தது. அவர் கட்டியது ஆறு லட்சம் டாலர்கள். சுமார் மூன்று கோடி ரூபாய்கள். சம்பாதித்ததையெல்லாம் கட்டி விட்டு கூரையைப் பிய்த்துக் கொண்டு பணம் கொட்டும் என காத்திருந்தார். ஒன்றும் கொட்டவில்லை. பதறி அடித்துக் கொண்டு பெருகுவேயில் இருந்த நைஜீரிய தூதரகத்துக்கு ஓடினார்.

அவர்களிடம் பேசியபோதுதான் இப்படி ஓர் ஏமாற்று வேலை நடந்திருப்பதை அவர் அறிந்தார். அதிர்ச்சியின் உச்சத்துக்கே போன அவர் கையிலிருந்த துப்பாக்கியால் சுட, அருகிலிருந்த அதிகாரி மைக்கேல் அந்த இடத்திலேயே பலியானார். தடுக்க வந்தவர்களுக்கும் காயம் ஏற்பட்டது. திடீர் பணக்காரர் ஆக வேண்டுமென விரும்பியவர் கடைசியில் குற்றவாளியானார்.

வெளிநாட்டிலிருந்து செக் வருகிறது, அப்படியே ஒரு மில்லியன் டாலர் மதிப்புள்ள பாண்ட் பேப்பர் வருகிறது என்றெல்லாம் வரும் மோசடிகள் இந்த வகைதான். ரகசியக் குரலில் உங்களுடைய கதவைத் தட்டும் எதையுமே, 'சாரி... கௌம்புங்க, காத்து வரட்டும்...' என விரட்டியடித்தால் நீங்கள் தப்புவீர்கள்.

'என் கையில இரிடியம் இருக்கு. அதை வாங்க ஜெர்மனியிலிருந்து ஒருத்தன் வரான். அதோட மொத்த மதிப்பு இரண்டு லட்சம் கோடி ரூபாய். அதை டெஸ்ட் பண்ண முதல்ல ஒருத்தன் வருவான். இரிடியத்தை நெல்லுக்கு பக்கத்துல வெச்சா நெல்லை அது இழுத்து எடுக்கும். தீக்கு பக்கத்துல வெச்சா தீ வளையும்...' இப்படியெல்லாம் கதை சொல்லிக் கொண்டு மோசடி நடத்தும் பலருடைய வழக்குகள் காவல் துறையிடம் உண்டு.

'மின்னல் தாக்கினால் செம்பு இரிடியம் ஆகிவிடும்' என இவர்கள் ஷாக் சயின்ஸ் பேசுவார்கள். இதையெல்லாம் நம்பிக் கொண்டு மின்னல் தாக்கிய செம்பு குடத்துக்காக வெட்டிக் கொண்ட ஆட்களும் உண்டு. மின்னல் தாக்கட்டும் என வீட்டிலிருக்கும் செம்பு பாத்திரங்களையெல்லாம் மாடியில் விரித்து வைக்கும் அப்பாவிகளும் உண்டு. பணம் பிடுங்கும் ஏமாற்று வேலையன்றி இதில் வேறு ஒன்றும் கிடையாது.

கிரெடிட் கார்டுகளை போலியாய் தயாரித்து ஏ.டி.எம் களில் பணம் திருடுவதாகட்டும், வங்கியின் பக்கத்தைப் போலியாய் தயாரித்து தகவல் திருடுவதாகட்டும், எல்லாமே திடீர் பணக்காரர்களாக விரும்புபவர்களின் தில்லு முல்லுகளே. உஷாராய் இருக்க வேண்டியதும், இத்தகைய வேலைகளில் ஈடுபடாமல் இருக்க வேண்டியதும் அவசியம்.

முன்பணமாக நீங்கள் பணம் கட்டுங்கள். உங்களை மகாலட்சுமி வந்து சந்திப்பாள் என சத்தியம் செய்யும் சர்வ சங்கதிகளும் ஏமாற்று வேலைகள்தான். எஸ்கேப் ஆகிவிடுங்கள்.

வழக்கத்துக்கு மீறிய சலுகைகள், பயன்கள், லாபம் இதெல்லாம் எச்சரிக்கை மணியை அடிக்கும் விஷயங்கள். உங்களை பணக்காரர் ஆக்குவதே லட்சியம் என யாரும் நேர்ச்சை செய்திருக்க வாய்ப்பில்லை.

இணையத்தில் பத்து மடங்கு கவனம் அவசியம். உங்கள் வங்கிக் கணக்கைப் பார்க்கும் போது கூட கவனம் வேண்டும். 'உடனே பணம் கொடு' என அவசரப்படுத்தும் எதையும் சீண்டவே சீண்டாதீர்கள். உதவிகள், நிவாரணங்கள் கொடுப்பதைக் கூட நேரில் கொடுக்கவே முயலுங்கள். நெட்டில் கெட்டவர்கள் உலவ வாய்ப்பு அதிகம். வெளிநாட்டில் வேலை எனும் அழைப்புகளை அதீத கவனத்துடன் அணுகுங்கள். தேவைப்பட்டால் அனுபவஸ்தர்கள், காவல்துறை போன்றவர்களின் உதவியை நாடத் தயங்காதீர்கள்.

உழைப்பை நம்புங்கள். திருட்டுத்தனமாய் முன்னேறியவர்களை எக்காரணம் கொண்டும் முன்னுதாரணமாய்க் கொள்ளாதீர்கள். அது உங்கள் தந்தையாகவே இருந்தாலும் தள்ளி வையுங்கள்.

வெற்றியை நோக்கி மனதில் நம்பிக்கையும், உற்சாகமும் கொண்டு ஓடுபவர்களை வெற்றி நிச்சயம் சந்திக்கும். பில்கேட்ஸ் கூட ஹார்வர்டு பல்கலைக்கழகத்திலிருந்து வெளியேறி, முதல் வேலையான டிராப் ஓ டேட்டா வில் தோற்று பின்னர்தான் மைக்ரோசாப்ட் மன்னனானார். அவர் வெற்றியை நோக்கி லட்சியங்களுடன் ஓடியவர்.

நாலு வயசு வரை பேச்சு வராமல், ஏழு வயசு வரை எழுதத் தெரியாமல், ஆசிரியர்களும் பெற்றோரும் அரை லூசு என கருதியவர்தான் ஐன்ஸ்டீன். நேராக ஓடிய அவருக்கு நோபல் பரிசு கிடைத்தது.

குறுக்குப் பாதையில் ஓடுபவர்களுக்குக் கிடைக்கும் வெற்றி, தளிர் இலைகளைப் போன்றது. விரைவிலேயே காய்ந்து விடும். நேரான பாதையில் ஓடுபவர்களுடைய வெற்றியோ உயர் மலைகளைப் போன்றது. அது வரலாறுகளின் முகப்புப் பக்கத்தில் கம்பீரத்துடன் இடம் பெறும்.

குறுக்கு வழி விலக்கு,
நேர்மையே நம் இலக்கு!

சேவியர்

Friday, March 16, 2012

புதியபாரதி- நவீனஉலகம்

காலைஎழுந்தவுடன்email
வாலைக்குமரியுடன்facebook
சாலை
முழுவதும்Mobile Talk
மாலை
முடியும்வரைChit Chat
மாலை
முடிந்ததும்Work Hour Start

பொய்யுரை எழுதStatus Reports
மெய்யுரை
சொல்லCompany Reports
பொய்யை
மெய்யாக்கStatus Call
மெய்யை
உறுதியாக்கConference Call
பொய்யும்
மெய்யும்கலந்தLive Call

டாகுமென்ட் எழுதCopy & Paste
ப்ரோக்ராம்
எழுதCut & Paste
மறந்ததைப்
படிக்கE-Learning
படிக்காமல்
உறங்கAudio-Learning
படித்ததை
நினைவூட்டGoogle Search

கூடிப் பேசConference Hall
கூடாமல்பேசCoffee Break
காதல்
செய்யLive Chat
குறட்டை
விடTraining Session
அரட்டை
அடிக்கLunch Break

ஓசியில் திங்கTeam Lunch
தின்றதைச்
செரிக்கGym Sport
ஊரைச்
சுற்றTeam Golf
ஆடிப்
பாடTeam Outing
ஓடி
விளையாடPaint Ball

பொழுது போக்கBirthday Party
இதையும்
மீறிFriday Pub
அதையும்
மீறிWeekend Party
ஆயிரம்
இருந்தும்NO PEACE OF MIND

Saturday, March 10, 2012

இளைஞனை இறுக்கும் இணைய வலை

பிரான்டி உல்ப் மூன்று வயதான அழகான பெண் குழந்தை. அவளுடைய தாய் 28 வயதான ரெபேக்கா காலீன் கிறிஸ்டி, விவாகரத்து ஆனவள். தாயின் பொழுது போக்கு இணையத்தில் கேம்ஸ் விளையாடுவது. சாதாரணமாக விளையாடத் துவங்கிய அவளை கொஞ்சம் கொஞ்சமாய் விளையாட்டு உள்ளிழுத்துக் கொண்டது. சாப்பாடு, தூக்கம் எல்லாவற்றையும் மறந்து விளையாடத் தொடங்கினாள். அவள் மறப்பதோடு நின்று விடாமல் குழந்தைக்கும் சாப்பாடு போட மறந்து விடுவாள் என்பது தான் துயரம்.

hZ‹ÛR ‘WÖÁzPÁ ÙWÚTeLÖ

தாய் விளையாடிக் கொண்டிருப்பாள், குழந்தை எதுவுமே இல்லாமல் பட்டினியில் வாடி வதங்கும். தண்ணீரோ, சாப்பாடோ எதுவும் இல்லாமல் கையில் என்ன கிடைக்கிறதோ அதை குழந்தை சாப்பிடும், நாய் உணவு உட்பட. குழந்தை மெலிந்து மெலிந்து எடை குறைந்து எலும்பும் தோலுமாகி விட்டது.

ஒருநாள் விளையாட்டின் மும்முரத்தில் இருந்தாள் தாய். மதியம் ஆரம்பித்த விளையாட்டு மாலை, இரவு என தொடர்ந்தது. இடைவெளி இல்லாமல் அதிகாலை மூன்று மணி வரைக்கும் விளையாடினாள். விளையாடிவிட்டு விருப்பமேயில்லாமல் எழுந்து வந்தவள் குழந்தை மயங்கிக் கிடப்பதைப் பார்த்து அதிர்ந்து போனாள். பசியினால் வாடி வதங்கிய அந்த மூன்று வயது தேவதை இறந்து போயிருந்தது.

அவளுக்கு 25 ஆண்டு காலம் சிறைத் தண்டனை விதித்து நீதிபதி தீர்ப்பளித்தார். 'ஐயோ... என்னுடைய குழந்தையை இழந்து விட்டேனே, பார்க்கணும் போல இருக்கே...' என கோர்ட்டில் அழுது புலம்பினாள் ரெபேக்கா. இப்போது அழுது என்ன செய்ய? போன உயிர் போனதுதானே?

குழந்தை பிரான்டியுடன் ரெபேக்கா
'இன்டர்நெட்ல கொஞ்ச நேரம் விளையாடினா என்ன ஆவப்போகுது'? என்றுதான் இந்த இணைய மோகம் ஆரம்பிக்கும். அச்சு அசலாய் புகைப்பழக்கம் எப்படி ஆரம்பிக்குமோ அதே போல. ஒரு தடவை இழுத்துப் பார்ப்போமே என ஆரம்பிக்கும் பழக்கம் இழுப்பவரை இழுத்துக் கொள்ளும். அதே போலதான் இதுவும்.

முதலில் கொஞ்ச நேரம், அப்புறம் நினைப்பதை விட அதிக நேரம். அப்புறம் நாள் முழுக்க. தூக்கம் இல்லாமல், வேலை செய்யாமல், சாப்பாடு இல்லாமல் என அது விரிவடையும். இந்த மோகம் எந்த நிலைக்கும் போகலாம் என்பதற்கு ரெபேக்கா ஒரு சின்ன உதாரணம்.

இணையம் ஓர் அற்புதமான சாதனம் என்பதை முதலிலேயே சொல்லி விடுகிறேன். குறிப்பாக கற்றுக் கொள்ள வேண்டும் எனும் ஆர்வமுடையவர்கள், பிறரோடு தொடர்பில் இருக்க வேண்டுமென விரும்புபவர்கள், கலைஞர்கள், செய்தியாளர்கள் இவர்களுக்கெல்லாம் இணையம் வரப்பிரசாதம். இணைய நன்மைகளைப் பட்டியலிட்டால் தனியே நான்கு புத்தகம் எழுதவேண்டி வரும்.

பாலையும், நீரையும் கலந்து வைத்தால் பாலை மட்டும் குடிக்கும் இலக்கிய அன்னப் பறவையாய் நாம் இருந்தால் அற்புதம். தவறுகளை நோக்கிப் போனாலோ அல்லது அளவுக்கு மீறிப் பயன்படுத்தினாலோ ஆபத்து சர்வ நிச்சயம்.

'இணையத்தைப் பயன்படுத்துவோரில் 5 முதல் 10 சதவீதம் வரையிலானவர்கள் தாங்கள் இணையத்துக்கு அடிமையானதை உணர்கிறார்கள்' என்கிறார் ஜெர்மி லாரன்ஸ் எனும் உடல்நல எழுத்தாளர்.

இணயத்தில் மெதுவாக 'சாட்' (Chat) செய்ய ஆரம்பிப்போம். பிறகு எப்போதும் கணினியின் ஓரத்தில் ஒரு 'சாட் விண்டோ' இருந்தால்தான் வேலை ஓடும் எனும் நிலை வரும். பெரும்பாலானவர்களுக்கு எதிர்பாலினருடன் செக்ஸ் உரையாடல் நடத்துவதில் நேரம் போவதே தெரியாது.

கடந்த சில ஆண்டுகளாக முன்னணியில் இருப்பவை பேஸ்புக், டுவிட்டர், ஆர்க்குட், மை ஸ்பேஸ் போன்ற சமூக வலையமைப்புகள். இதில் நண்பர்களை கண்டுபிடிப்பது, அவர்களோடு பேசுவது, புது நபர்களைத் தேடுவது, அவர்களுடன் கதைப்பது என நேரம் போவதே தெரியாமல் விளையாட்டு களைகட்டும். வாழ்க்கைக்குத் தேவையான விஷயங்கள் எல்லாமே பின்னுக்குத் தள்ளப்பட்டு விடும்.

பாலியல் கதைகள், படங்கள், விடியோக்கள் என மாட்டிக் கொள்பவர்கள் கதி ரொம்பப் பரிதாபம். அது ஒரு பெர்முடா முக் கோணம் போல. எட்டிப் பார்த்தாலே இழுத்துக் கொள்ளும் சிக்கலான விஷயம். இணைய உலகின் இன்றைய கணக்குப் படி சுமார் இரண்டரை கோடி பாலியல் வலைத்தளங்கள் உள்ளன. ஒவ்வொரு வினாடியும் சுமார் ஒன்றரை லட்சம் ரூபாய்கள் இதற்காய் செலவிடப்படுகின்றன. தேடுதல் தளங்களில் 25 சதவீதம் பாலியல் தேடல்களே. தரவிறக்கு களில் 35 சதவீதம் பாலியல் சார்ந்தவையே.

இந்தப் புள்ளிவிவரங்களே போதும், இணைய உலகை பாலியல் எவ்வளவு ஆழமாய்ப் பாதித்திருக்கிறது என்பதை உணர. இதில் மாட்டிக் கொள்பவர்கள் தங்கள் நேரம், வாழ்க்கை, குடும்ப உறவுகள் என எல்லாவற்றையுமே இழந்து விடும் அபாயம் உண்டு.

இன்டர்நெட்டுக்கு அடிமையாவதை யாரும் சீரியசாய் எடுத்துக் கொள்வதில்லை. ஆனால் இனிமேல் அப்படி இருக்க முடியாது என எச்சரிக்கிறது சமீபத்திய ஆய்வு ஒன்று. 'இணையத்துக்கும், இணைய விளையாட்டுகளுக்கும் அடிமையாகும் மக்களுடைய மூளையில் கணிசமான மாற்றங்கள் ஏற்படுகின்றன' என்று அதிர்ச்சி முடிவை வெளியிட்டிருக்கிறது.

இந்த மாற்றம் கஞ்சா, கோகைன் போன்ற போதை அடிமைகளின் மூளையிலுள்ள மாற்றங்களை ஒத்திருக்கிறது. இணைய அடிமைகளின் மூளையை ஸ்கேன் செய்து பார்த்ததில் இது கண்டுபிடிக்கப்பட்டுள்ளது. மூளையின் உணர்வுப் பகுதி, கவனப் பகுதி, முடிவெடுக்கும் பகுதி போன்ற பகுதிகளின் இணைப்பு வலுவிழந்து விடுகிறதாம். எனவே இந்த இணைய அடிமைத்தனத்தை மிக சீரியசாய் எடுத்துக் கொள்ள வேண்டும் என்கின்றனர் ஆராய்ச்சியாளர்கள்.

'இணையத்தை விட முடியாதவர்கள் பலர் திருமணத்தில் தோல்வி, கல்வியில் தோல்வி, வேலையில் தோல்வி என படிப்படியாய் தோல்வியடைகிறார்கள்' என்கிறார் லண்டன் இம்பீரியல் கல்லூரியிலுள்ள பேராசிரியர் ஹென்ரீடா பவுடன் ஜோன்ஸ். இவர் அங்கு இணைய மற்றும் ஆன்லைன் விளையாட்டு அடிமைத்தனங்கள் குறித்த ஆய்வுகளை மேற்கொள்கிறார்.

நாற்பத்து ஒன்று வயதான லூசியானா மெய்னி எனும் இங்கிலாந்துப் பெண்மணி, ஆன்லைன் விளையாட்டுக்குப் பணம் வேண்டும் என்பதற்காக அலுவலகத்தில் தில்லுமுல்லு விளையாட்டுகளை விளையாடியிருக்கிறார். அப்படி சுட்டுச் சுட்டுச் சேகரித்த பணம் சுமார் நாற்பது லட்சம் ரூபாய்கள். இப்போது கம்பி எண்ணிக் கொண்டிருக்கிறார்.

'ஆன்லைனில் விளையாடும் அடிமைத்தனமும், மதுவுக்கு அடிமையாவதும் ஒரே போன்ற சங்கதிகளே' என்கிறார் நாட்டிங்காம் பல்கலைக்கழக பேராசிரியர் மார்க் கிரிபிட்ஸ்.

மருத்துவம் இப்போது இதை சிக்கலான ஒரு பிரச்சினை என்று ஒத்துக் கொண்டிருக்கிறது. இணையத்தை கட்டிக் கொண்டு தூக்கத்தைத் தொலைப்பவர்கள் மன அழுத்தம், எரிச்சல், கோபம், தலைவலி, பதட்டம், கவனமின்மை, சோர்வு, தனிமை, குற்ற உணர்வு போன்ற பலவீனங்களுக்கு ஆளாவார்கள் என எச்சரிக்கிறது.

குடும்ப உறவுகளோடு செலவிடும் நேரம் குறைந்து போய் உறவு வாழ்க்கை பலவீனமடைகிறது. சுமார் 6 சதவீதம் பயன்பாட்டாளர்கள் இதை வெளிப்படையாக ஒத்துக் கொள்கிறார்கள். யுனைடெட் கிங்டத்தில் சுமார் 33 சதவீதம் விவாகரத்துகளுக்கு பேஸ்புக் காரணமாய் இருக்கிறது.

சீனாவில் நிலைமை இன்னும் மோசம். 42 சதவீதம் இளைஞர்கள் இதன் அடிமைகள். இரவு முழுவதும் இன்டர்நெட் கபேக்களில் இளைஞர்கள் விழித்துக் கிடப்பது சர்வ சாதாரண நிகழ்வு. 7 விழுக்காடு நடுநிலைப்பள்ளி மாணவ மாணவியர் இணைய வலையில் சிக்கிக் கிடப்பவர்கள் என்பது அதிர்ச்சித் தகவல்.

அதீத இன்டர்நெட் பயன்பாடு சமூக ஈடுபாட்டை குறைக்கிறது அல்லது தடுக்கிறது. இதனால் இளைஞர்களுடைய தன்னம்பிக்கை முனை பழுதுபடுகிறது. அவர்கள் தங்களுடைய பிரச்சினைகளிலிருந்து தப்ப மீண்டும் மீண்டும் இணையத்தில் சரணடைந்து விடுகிறார்கள். பலர் தங்களுடைய தோல்விகள், ஏமாற்றங்கள் இவற்றை வெற்றியாக மாற்ற முயலாமல் தீக்கோழி போல இணையத்தில் தலை புதைக்கிறார்கள். தண்ணியடித்து சோகம் மறக்க நினைக்கும் முட்டாள்தனத்தைப் போல.

இணையத்தினால் 40 சதவீதம் பணி தொய்வு ஏற்படுவதாய் ஓர் அமெரிக்க புள்ளி விவரம் தெரிவிக்கிறது. காரணம் 60 சதவீதம் ஆன்லைன் வர்த்தகமும், 70 சதவீத பாலியல் தகவல் மேய்தலும் அலுவல் நேரத்தில்தான் நடக்கிறதாம். 12 சதவீதம் அமெரிக்கர்களும், 30 சதவீதம் கொரிய மக்களும் இன்டர்நெட் தங்களுக்கு மாபெரும் போதையாய் இருப்பதை ஒத்துக் கொள்கின்றனர். ஆசிய நாடுகளில் இது இன்னும் அதிகமாம்.

இணைய பலவீனத்திலிருந்து விடுபடவேண்டியதும், இணையத்தை ஆரோக்கியமான வழிகளில் செலவிட வேண்டியதும் இளைஞர்கள் செய்ய வேண்டிய முக்கியமான இரண்டு விஷயங்கள்.

முதலில் ஓவராக இன்டர்நெட் பார்க்கிறீர்களெனில் அதை உணர வேண்டும். ஒருநாள் எத்தனை தடவை இணையத்தில் நுழைகிறீர்கள், எவ்வளவு நேரம் சாட்டிங் செய்கிறீர்கள், அடிக்கடி ஒரு பக்கத்தை எட்டி எட்டிப் பார்க்கிறீர்களா, பேஸ்புக், டுவிட்டர், மைஸ்பேஸ், ஆர்க்குட் போன்ற தளங் களில் எவ்வளவு நேரம் செலவிடுகிறீர்கள் என கணக்குப் போட்டுப் பாருங்கள்.

தேவையல்லாத இணைய வாசிப்பை நிறுத்துங்கள். அதற்கு மிகச் சிறந்த வழி, அதைத் தவிர வேறு ஒரு நல்ல பொழுது போக்கில் உங்கள் கவனத்தைச் செலுத்துவதுதான்.

பொதுவாக ஆன்லைன் விளையாட்டு, சாட்டிங் போன்றவற்றை குறையுங்கள். போர்னோகிராபி எனப்படும் பாலியல் தேடுதலை அடியோடு நிறுத்துங்கள். கணினியை விட்டு விட்டு எழுந்து நடப்பது, நண்பர்களுடன் அரட்டை அடிப்பது, வெளியே எங்கேயாவது போய் வருவது என சிந்தனையை வேறு பக்கம் திருப்புங்கள்.

இணைய அடிமைத்தனத்தை இன்டர்நெட் அடிக்ஷன் டிஸார்டர் (IAD) என மருத்துவம் அழைக்கிறது. இதற்குச் சிகிச்சை செய்ய உலகின் பல இடங்களிலும் இணைய அடிக்ஷன் சிகிச்சை நிலையங்கள் ஏற்படுத்தப்பட்டுள்ளன. இணைய அடிமைத்தனம் சீரியசான ஒன்று என்பதற்கு இவையே சாட்சி.

இணைய அடிமைத்தனத்தை எளிதாய் வெற்றி கொள்ள முடியும். வெற்றி கொள்ளுங்கள். தொழில் நுட்பத்தை ஆக்கபூர்வமாய் பயன்படுத்துங்கள்.

சரியாய் கையாளும் இணையம்
இமயம் ஏற்றும் உனையும்!

சேவியர்

Wednesday, March 7, 2012

மிகப் பெரிய கலைக் குற்றம்


மக்கள் நடமாட்டம் அதிகம் உள்ள இடங்களில் 10 அடி உயரத்தில் இரண்டு மூங்கில் கம்புகளுக்கு இடையே அந்தரத்தில் கயிற்றை கட்டி வித்தை காட்டும் கலைக் கூத்தாடிகளை பார்த்திருப்பீர்கள். இதையே மிக பெரிய அளவில் கற்பனை செய்து பாருங்கள். 10 அடி உயரத்திற்கு பதிலாக 1,368 அடி உயரம், மூங்கில் கம்புகளுக்குப் பதிலாக இரட்டைக் கோபுரத்தை (தீவிரவாதிகளால் தரைமட்டமாக்கப்பட்ட அதே அமெரிக்க இரட்டை கோபுரம் தான்) பயன்படுத்தினார்.

கலைக்கூத்தாடிகளின் சர்வதேச அடையாளம்தான் பிலிப் பெட்டி என்பவர். எங்கேயாவது உயரமாக எதையாவது பார்த்தால் போதும் உடனே ஓடிப்போய் கயிறு கட்டி அதன்மேல் நடக்க தொடங்கிவிடுவார். பிலிப் 1949ல் பிரான்சில் பிறந்தவர். மற்றவர்கள் தரையில் நின்று செய்யத்தயங்கும் பல விஷயங்களை அனாயசமாக கயிற்றில் நின்று கொண்டு செய்வார். இரட்டை கோபுரங்களுக்கு இடையே கம்பி கம்பி கட்டி நடந்ததுதான் இவரின் சாதனைகளில் உச்சம்.

ஒரு புத்தகத்தில் உலகிலேயே உயரமான கட்டிடம் இரட்டை கோபுரம்தான் என்பதை படித்துவிட்டார். ஒரே உயரத்தில் அருகருகே இரண்டு கட்டிடங்கள் இருப்பது பிலிப்புக்கு வசதியாகி போய்விட்டது. உடனே எப்படியாவது அதன் இடையே கம்பி கட்டி நடக்க வேண்டும் என்று ஆசை ஏற்பட்டது.

இரட்டை கோபுரத்தின் உயரத்திற்கு நினைத்தபடி போய்விட முடியாது. அங்கு ஏகப்பட்ட பாதுகாப்பு கெடுபிடிகள் உண்டு. அதையெல்லாம் மீறி சாதனை படைக்க வேண்டும் என்பதற்காக திட்டம் தீட்டி 6 வருடங்கள் பாடாதபாடு பட்டார். இரட்டை கோபுர கட்டிடங்களின் உயரம் 1,368 அடி. இரண்டுக்கும் இடைவெளி 140 அடி. இரண்டு கட்டிடங்களையும் இணைக்க நூற்றுக்கணக்கான கிலோ எடையில் கம்பி வேண்டும். கடுமையான பாதுகாப்பு மிகுந்த அந்த இடத்தில் அவ்வளவு உயரத்திற்கு எப்படி இத்தனை எடையையும் போலிஸ் கண்ணில் மண்ணைத் தூவி எடுத்துச் செல்வது ? இது நடக்கவே நடக்காது என்று எல்லோரும் நினைத்தார்கள். ஆனால், கடும் முயற்சி எடுத்து யாருக்கும் தெரியாமல் கம்பி போன்ற சாதனங்களை கொஞ்சம் கொஞ்சமாக கொண்டு தனது சாதனையை பிலிப் நிகழ்த்திக் காட்டினார்.

1974 -ம் வருடம் ஆகஸ்ட் மாதம் 7ந்தேதி  காலை 7.15 மணிக்கு இரட்டை கோபுரங்களுக்கு இடையே கம்பியை கட்டி நடந்தார். 140 அடி தூரத்தை கம்பி மேல் நடந்து கடக்க சுமார் 45 நிமிடம் பிடித்தது. முறைப்படி அனுமதி பெற்று இந்த சாதனையை செய்யவே ஏகப்பட்டவர்களின் உதவி வேண்டும். ஆனால், தனி ஆளாக யாருக்கும் தெரியாமல் இந்த சாகசத்தை நிகழ்த்தி முடித்தவுடன் பிலிப்பை போலிஸ் கைது செய்து சிறையில் அடைத்து. "இந்த நூற்றாண்டின் மிகப் பெரிய கலைக்குற்றம்" என்று இதை அமெரிக்கா சொன்னது.

பிலிப் பெட்டியின் திட்டமிடலும் இந்த சாகசமும் "மேன் ஆன் ஒயர்" என்ற பெயரில் டாக்குமெண்டரி படமாக வெளிவந்து ஆஸ்கர் விருதையும் பெற்றது.  

Monday, March 5, 2012

கவிதைச்சரம்

சமைக்கக் கற்றுக்கொள்கிறாள் மகள்

மைக்கக் கற்றுக்கொள்கிறாள் மகள்.
பிசிபிசுத்த பாத்திரங்கள் காத்திருக்கின்றன.
சமையலறை
பென்சில் டப்பாவைப் போல
ஏன் சின்னதாக இருக்கிறதென்கிறாள்.
தீப்பெட்டிகளைக் கையாண்டவர்கள்
ஏன் நனைந்துபோனார்கள் என்கிறாள்.
ஒட்டடை மிகுந்த அறைகளைவிட
கரி படிந்த சமையலறையில்
அம்மாவின் வாசனையிருப்பதைக் கண்டுபிடிக்கிறாள்.
சமையலறையில் வாழ்ந்தவர்களின்
பொருமல்கள் கடுகு டப்பாவிலிருக்கலாம்
கோபம் மிளகாய் டப்பாவிலிருக்கலாம்
தன் உடம்பை பிரஷர் குக்கராக்கி வாழ்ந்திருக்கிறார்கள்
எத்தனை தலைமுறைகளைச் சந்தித்திருக்கிறது சமையலறை.
மண் பாத்திரங்களாய்
எவர்சில்வர் பாத்திரங்களாய்
வெள்ளிப் பாத்திரங்களாய்
எல்லாம் மாறி
பிளாஸ்டிக் தலைமுறை வந்திருக்கிறது.
பாத்திரங்களைப் போல மனுஷிகளும்.
மகள் தேடிக்கொண்டிருக்கிறாள்
எந்த டப்பாவில் அம்மாவின் விரல்களிருன்தன 
எந்த டப்பாவில் அம்மாவின் கண்ணீ ரிருன்தது 
எந்தச் சமையல் செய்யும்போது அம்மா சிரித்திருப்பாள்
அம்மா, ஆயா, ஆயாவுக்கு ஆயா, கொள்ளுப்பாட்டிகளில்
யார் உப்பாகக் கரைந்துபோனார்கள்
யார் ஏலக்காய்போல வாசனை வீசினார்கள்
யார் கறிவேப்பிலைபோல வதந்கிப்போனார்கள்
எதைக் கற்றுக்கொள்ளப்போகிறாள் மகள்.
மீந்துபோன பருக்கைகளாய்
எத்தனை துயரங்கள்
மொழி அறியாத காக்கைகள் எடுத்துச் சென்றன.
கழிவு நீரோடு கலந்துபோன பெருமூச்சுகள் எத்தனை
எத்தனை கனவுகள் அடுப்புக்குள் எரிந்துபோயின.
மகள் இன்னும் அடுப்பைப் பற்றவைக்கவில்லை
புதிய தீக்குச்சிகள் இருக்கின்றன
சமையலறையை டைனோசரைப் போல
பார்த்துக்கொண்டிருக்கிறாள்
பழகிவிடும் டைனோசர் இன்னும் சில நாட்களில்!

கோசின்ரா


*************************************************


வெட்கத்தின் வண்ணம்

ழகு நிலையமொன்றில்
ஒப்பனையூட்டப்பட்டு
இரு சக்கர வாகனத்தின் பின்னிறுத்தி
அழைத்துச் செல்லப்படும் பெண்
நெரிசல்மிக்க கடைவீதியைக்
கடந்து செல்லும்போது
தனது முகத்தில் சேர்கிறது
எந்தச் சாயமும் தந்திடாத
வெட்கத்தின் புது வண்ணம் !

கே.ஸ்டாலின்




*************************************************


காணிக்கை

டைமுறைப்படுத்த
முடிந்ததோ இல்லையோ
எழுதவாவது முடிந்தது
'லஞ்சம் கொடுப்பது குற்றம்' என்று
அரசு அலுவலகங்களில்.
எழுதக்கூட முடியவில்லை
கோயில்களில் !

நேசன்      

Saturday, March 3, 2012

இந்த தடைகளை தாண்டுங்கள்

நதியைக் கவனித்திருக்கிறீர் களா? சமதளத்தில் மென்மையாக ஓடிக் கொண்டிருக்கும். பாறைகளின் இடையே ஓடும் போது சலசலவென தாவி ஓடும். அருவியில் வருகையில் உடைந்து வீழும். ஆனால் விழுந்த இடத்திலேயே காலொடிந்து கிடப்பதில்லை. ஆக்ரோஷம் கூட்டி இன்னும் அதிக வேகமாய் ஓடும்.

தடைகள் இல்லாத பயணமே கிடையாது. தடைகளைத் தாண்டி ஓட வேண்டும். ஐயையோ தடை வந்துவிட்டதே என உடைந்து போய் உட்கார்ந்தால் வெற்றி கிடைக்காது. தடைகள் வரும்போது, வேகம் குறையலாம், அல்லது தாமதம் நேரலாம். ஆனால் முறியடித்து முன்னேறுவதில் தான் சாதனைகள் அடங்கியிருக்கின்றன.

இன்றைய இளைஞர்களின் முன்னே நிற்கும் முக்கியமான சிக்கல்களாக இவற்றைச் சொல்லலாம்.

போதை: இன்று, நேற்றல்ல, எப்போதுமே ஓர் இளைஞனின் வெற்றியை வெட்டிப் போட போதைப் பழக்கம் மட்டுமே போதும். நிகோடினை நுரையீரலுக்கு நேரடியாய் இறக்கி வைக்கும் புகை அதில் முக்கியமான ஒன்று. பள்ளிக்கூடப் படி தாண்டும் முன்பே பலருக்கும் புகை பழகிவிடுகிறது.

உலகில் எங்கே என்ன தடை செய்யப்பட்டாலும் அது நம்ம ஊரில் கிடைக்கிறது. இன்றைக்கு இளைஞர்களுக்கு போதை வஸ்துகள் எப்படி கிடைக்கின்றன என இங்கிலாந்தில் ஓர் ஆய்வு நடத்தினார்கள். `நெட்ல எல்லா மேட்டரும் இருக்கு' என 64 சதவீதம் இளைஞர்கள் பதில் சொன்னார்கள்.

பண்டிகை நாட்களில் டாஸ்மாக் விற்பனை மிரள வைக்கிறதா இல்லையா? போதைப் பொருட்களால் உடலுக்கு தீமை என 91 சதவீதம் இளைஞர்கள் ஒத்துக் கொள்கின்றனர். ஆனால் அதை விட்டு விலகுவதில்லை.

புற்றுநோய், மன அழுத்தம், சிறுநீரகப் பாதிப்பு, மூளை பாதிப்பு, நரம்பு பாதிப்பு என வரிசையாய் அத்தனை நோய்களையும் தந்து செல்லும் போதையைத் தாண்டுவது இளைஞர்கள் செய்ய வேண்டிய முதல் தடை தாண்டல்.

இணைய அடிமைத்தனம்: உங்களுக்கு ஓர் அடிமை இருக்கிறான் என்று வைத்துக் கொள்ளுங்கள். நீங்கள் என்ன சொன்னாலும் செய்வான். மாடியிலிருந்து குதிக்கச் சொன்னால் கூட குதிப்பான். எஜமானனை மீறி அவன் எதுவும் செய்ய மாட்டான். அவனுக்கு எல்லாமே எஜமானன்தான்.

இப்போது இணைய அடிமைத்தனத்துக்கு வருவோம். சிலருக்கு எல்லாமே இணையம்தான். குறிப்பாக இணையத்தில் பாலியல் சார்ந்த கிளர்ச்சிகளைத் தேடி அலையும் இளைஞர்கள் அந்த வலைக்கு முழு அடிமையாகி விடுகிறார்கள். போதைக்கு அடிமையாவது போல இணையத்துக்கு அடிமையாவதும் ஒரு மிகப்பெரிய பலவீனமே.

இணைய அடிமைகள் அடிமையாகும் இடங்கள் என்னென்ன தெரியுமா? பாலியல், விளையாட்டு, சமூக வலைத்தளம், வலைப்பூக்கள், மின்னஞ்சல், சேட்டிங், ஷாப்பிங் இவையெல்லாம்தான்.

மருத்துவம் இதை இன்டர்நெட் அடிக்ஷன் டிஸார்டர் (IAD) என்கிறது. இணையம் எனும் அற்புதமான ஊடகம் சரியாகப் பயன்படுத்தினால் பாற்கடல். அதற்கு அடிமையாகி விட்டாலோ அதுவே விஷமாக மாறிவிடும் நச்சுக்கடல்.

இளைஞர்கள் இன்றைக்குத் தாண்ட வேண்டிய இன்னொரு தடை இந்த இணைய அடிமைத்தனம்.

வன்முறை சிந்தனை: வீரத்தையும், சண்டித்தனத்தையும் போட்டுக் குழப்பிக் கொள்ளும் இளைஞர்களிடம் தேவையற்ற வன்முறை சிந்தனை மேலோங்கி இருக்கிறது.

ஒரு காலத்தில் அமெரிக்கா போன்ற மேலை நாடுகளில் மட்டும்தான் பள்ளி, கல்லூரிகளில் வன்முறை வெறியாட்டம் நடக்கும். இன்று நமது தெருக்களிலும் நடக்கின்றன. அமெரிக்காவில் கல்வி நிலையங்களில் கடந்த பத்து ஆண்டுகளில் நடந்த துப்பாக்கிச் சூடுகள் மட்டும் 147. மொத்த சாவு எண்ணிக்கை 359 என்கிறது ஒரு புள்ளி விவரம்.

ஆசிரியையை கத்தியால் குத்திக் கொல்கிறான் மாணவன், ஆசிரியர் அடித்ததால் மாணவனுடைய கை செயலிழந்து விட்டதாய் வேளச்சேரி வீதிப் போராட்டம் நடத்து கிறது. ஆசிரியர் அடித்ததால் மாணவனின் காது கேட்கவில்லை என இன்னோர் மாநிலத்தில் குரல் எழுகிறது.

சமீபத்தில் கள்ளக்குறிச்சி பள்ளி மாணவர்கள் செய்த நிகழ்வு நெகிழ வைத்தது. 50 ஆண்டுகளுக்குப் பின் தங்கள் ஆசிரியர்களையெல்லாம் வரிசையாய் நிற்க வைத்து அவர்கள் காலில் சாஷ்டாங்கமாய் விழுந்தார்கள். பழைய ஆசிரியர் -மாணவர் உறவு இப்படி இருந்தது. ஆசிரியர்களிடம் மாணவர்களை பெற்றோர் முழுமையாய் ஒப்படைத்தார்கள். ஆசிரியர்களை தெய்வங்களாய் மதிக்குமளவுக்கு அவர்களுடைய வழிகாட்டல் இருந்தது.

இப்போது எல்லாம் மாறிவிட்டது. ஆசிரியர்களை பாடங்கள் சொல்லித் தரும் பணியாளர்களாய்தான் பெற்றோர் பார்க்கின்றனர். பெரும்பாலான ஆசிரியர்களும் இதை மாத ஊதியம் தரும் ஒரு வேலையாகத்தான் பார்க்கிறார்கள். மாணவர்களின் மனதில் வன்முறை எண்ணங்கள் பெருக நல்வழிப்படுத்தாத ஆசிரியர்கள் ஒரு காரணம். ஆசிரியர்களுக்கு அந்த உரிமையைக் கொடுக்காத பெற்றோர் இன்னொரு காரணம்.

போதாக்குறைக்கு தொலைக்காட்சிகள், திரைப்படங்கள் போன்றவை வன்முறையையும், அதன் நுணுக்கங்களையும் சொல்லித் தந்து விடுகின்றன. தார்மீகக் கோபம் கொண்டு சமூக அவலங்களுக்கு எதிராகப் போராட வேண்டியது இளைஞனின் பணி. மற்றபடி தேவையற்ற வன்முறை சிந்தனை இளைஞர்கள் தாண்ட வேண்டிய இன்னொரு தடை.

உடல் நலம் பேணாமை: மேலைநாட்டு பிரச்சினையாய் இருந்த 'ஒபிசிடி' எனும் அதிக உடல் பருமன் இன்றைக்கு வீட்டுக்கு வீடு. காரணம் ஆரோக்கியமற்ற வாழ்க்கை மற்றும் உணவு முறை.

பழைய வாழ்க்கை இளைஞர்களை நடக்க வைத்தது. அவர்கள் உடல் உழைப்பை செலுத்தினார்கள். ஓய்வு நேரத்தில் நீச்சலடித்தார்கள், ஓடியாடி விளையாடினார்கள். உடல் கட்டுக்கோப்பாய் இருந்தது.

இன்றைக்கு ஒரு கிலோ மீட்டர் தூரத்தில் இருக்கும் அலுவலகத்துக்கே காரோ, பைக்கோ தேவைப்படுகிறது. முதலாவது மாடிக்கு மூச்சிரைக்காமல் போக லிப்ட் தேவைப்படுகிறது. ஓய்வு நேரத்தில் ஆடாமல் அசையாமல் தொலைக்காட்சி, இன்னும் நேரம் கிடைத்தால் வீடியோ கேம் அல்லது இன்டர்நெட்.

இப்படி, உடலானது பராமரிப்பில்லாத ஒரு கூடாரம் போல சிதிலமடைந்து கிடக்கிறது. பல இளைஞர்கள் பெயரளவில் இளைஞர்கள், உடலளவில் முதியவர்கள் என்பது தான் உண்மை. இளைஞர்கள் தாண்ட வேண்டிய இன்னொரு தடை இது.

நாகரீகமின்மை: மருத்துவமனை வாசலில் டாக்டருக்காய் கவலையுடன் காத்திருக்கும் இடைவெளியில் ஒலிக்கிறது ஓர் இளைஞனின் தொலைபேசி. 'ஒய் திஸ் கொல வெறி கொல வெறி கொல வெறிடி..'. மருத்துவமனையில் பல்வேறு கவலைகளுடனும், துயரங்களுடனும் காத்திருக்கும் மக்களுக்கு எரிச்சலை உருவாக்குகிறது அது. இளைஞனோ எதையும் கண்டுகொள்ளவில்லை, ஆமை வேகத்தில் தொலைபேசுகிறான்.

மருத்துவமனை, நூலகம், தொழுகைக் கூடங்கள் இவற்றிலெல்லாம் அமைதியைக் கடைபிடிக்க வேண்டும் என்பது அடிப்படை நாகரீகம்.

பொது இடத்தில் அமைதியைக் கடைபிடிப்பது, பண்புடன் நடந்து கொள்வது, பெரியவர்களிடம் அன்புடன் நடந்து கொள்வது, சமூகக் கடமையோடு இருப்பது என இளைஞர்கள் கற்க வேண்டிய விஷயங்கள் நிறைய உண்டு.

'இந்தக் காலத்துப் பசங்க நாகரீகம் இல்லாதவங்க...' எனும் குற்றச்சாட்டைத் தாண்ட ஒரு கட்டாயத் தாவல் அவசியம்.

தவறான முன்னுதாரணங்கள்: `ஒரு முன்னுதாரணத்தைப் போல நம்மைப் பாதிப்பது எதுவும் இல்லை' என்கிறார் பிரெஞ்சு மேதை பிரான்காயிஸ்.

பண்டைய காலத்தில் குருகுலத்தில் குருவை முன்னுதாரணமாய்க் கொண்டு அறிவிலும் ஞானத்திலும் வளர்ந்தார்கள் நமது தமிழ் இளைஞர்கள். இன்றைக்கு அவர்களுக்கு முன்னுதாரணமாக இருப்பவர்கள் பெரும்பாலும் திரை வசீகரங்களோ, விளையாட்டு வீரர்களோ, பணக்கார தலைவர்களோதான்.

அதிலென்ன தப்பு என்று கேட்பவர்கள் உண்டு. வெற்றியாளர்களின் வாழ்க்கையை அலசி, நல்ல அம்சங்களை எடுத்தால் பாராட்டலாம். ஆனால் பெரும்பாலும் நாம் அவர்களுடைய புகழ் பாடும் சுவரொட்டிகளாக மாறி விடுகிறோம்.

ஒரு நல்ல முன்னுதாரணத்தையும், ஒரு நல்ல வழிகாட்டியையும் கொண்டிருப்பது வெற்றிக் கதவை தொட்டுத் திறக்க அவசியத் தேவை.

தவறான முன்னுதாரணங்களைத் தாண்டி ஓட வேண்டியது இளைஞர்கள் செய்ய வேண்டிய அடுத்த தாவல்.

உறவுச் சிக்கல்கள்: 'பிரண்ட் என் கூட பேச மாட்டேங்கறா... நான் தற்கொலை செய்து கொள்கிறேன்' என்று எழுதி வைத்து விட்டு பதின் வயது மாணவி தற்கொலை செய்து கொள்கிறாள். `விடுதியில் மாணவர்கள் கிண்டலடிக்கிறார்கள்' என்று சொல்லி விடுதி மாணவன் தூக்கில் தொங்குகிறான். காதலி மறுத்தாள் என அவள் வீட்டு முன்னால் உயிரை மாய்க் கிறான் காதலன்.

இளைஞர்கள் உறவு ரீதியான சிக்கல்களை எதிர்கொள்ளும் பக்குவம் இல்லாமல் இருக்கிறார்களோ என அச்சமாக இருக்கிறது. தனது சாவின் மூலம் இன்னொருவருக்குப் பாடம் புகட்ட நினைக்கும் தவறான மனநிலை இது. நண்பனுக்கு இன்னோர் நண்பன் கிடைப்பான், தோழிக்கு இன்னோர் தோழி, காதலிக்கு இன்னோர் காதலன். இழப்பு என்னவோ இறந்தவனுக்கு மட்டுமே. இதை இளைஞர்கள் புரிந்து கொள்ள வேண்டும்.

மூன்று விஷயங்கள் முக்கியத் தேவை. விமர்சனங்களில் உடைந்து போய்விடாத மனம். அடுத்தவர்களோடு ஒப்பிட்டு தாழ்வு கொள்ளாத மனம். இணைந்து வாழும் ஆனந்த மனம். அவ்வளவுதான். இணைந்து வாழும் இளைஞர்கள் மன அழுத்தமில்லாத வாழ்க்கையை வாழ்கிறார்கள் என்கிறது உளவியல்.

உறவுச் சிக்கல்கள், இளைஞர்கள் தாண்டவேண்டிய இன்னொரு தடைக்கல்.

மனம் சார்ந்த சிக்கல்கள்: இளைஞர்களுடைய மன அழுத்தம் பெரும்பாலும் அடுத்தவர்களால் நிர்ணயிக்கப்படுகிறது. முதல் மார்க் வாங்காவிட்டால் ஏதோ பெரிய பாவம் செய்தது போல பிள்ளைகளைப் பார்க்கும் பெற்றோர் உண்டு. விருப்பமில்லாத படிப்புக்காய் தலையணை புத்தகங்களுடன் மன அழுத்தத்தைச் சுமக்கும் மாணவர்கள் உண்டு.

போதாக்குறைக்கு சினிமா, விளம்பரங்கள், ஊடகங்கள் போன்றவையும் ஏகப்பட்ட நிர்ப்பந்தங்களை இடுகின்றன. `உங்கள் வாழ்க்கை இப்படி இருக்க வேண்டும்', 'இந்த வீடுதான் வேண்டும், இந்த கார்தான் வேண்டும், இந்த சுற்றுலா வேண்டும்' என்றெல்லாம் ஊடகங்கள் சொல்லும் விதிமுறைகள் இளைஞர்களை மன அழுத்தத்தில் தள்ளுவதுண்டு.

தன்னை அறிந்து, தன் ஆழ்மன விருப்பத்துக்கேற்ற ஒரு லட்சியத்தை அமைத்துக் கொள்வதும், வெற்றியும் தோல்வியும் வாழ்வின் பாகங்கள் என புரிந்து கொள்வதுமே இளைஞர்களின் தேவை.

மன அழுத்தத்தையும் இளைஞர்கள் தாண்டிவிட்டால் அவர்கள் வெற்றியின் முற்றத்தை எட்டி விட்டார்கள் என்பதே பொருள்.

துருப்பிடித்த மனதைத் துலக்கு
வெற்றி மட்டுமே இலக்கு!

சேவியர்